विष्णु पौडेललाई बिनासर्त रिहाइ गर्न एमालेको माग, राजनीतिक र कानुनी दुवै रूपमा प्रतिवाद गर्ने

नेकपा एमालेले आफ्ना उपाध्यक्ष विष्णु पौडेलको बिनासर्त रिहाइको माग गरेको छ।

गएराति अध्यक्ष केपी शर्मा ओलीको निवास गुण्डुमा बसेको एमाले सचिवालय बैठकले पौडेलको गिरफ्तारीलाई राजनीतिक प्रतिशोध, पूर्वाग्रह र गैरकानुनी कदम ठहर गरेको छ। 

एमाले सचिव महेश बस्नेतले भने, ‘बिनावस्तुगत तथ्य र प्रमाण केवल राजनीतिक उद्देश्यका साथ गरिएको यस कदमको राजनीतिक र कानुनी दुवै रूपमा सशक्त प्रतिवाद गर्ने निर्णय बैठकले गरेको छ।’

साथै ‘बैठकले पौडेलको अविलम्ब बिनासर्त रिहाइको माग गर्दै लोकतान्त्रिक मूल्य, विधिको शासन र नागरिक अधिकारमाथि हुने कुनै पनि प्रकारको हस्तक्षेपविरुद्ध देशव्यापी राजनीतिक प्रतिरोध तथा भण्डाफोर अभियान सञ्चालन गर्न सम्पूर्ण पार्टी पंक्ति र न्यायप्रेमी जनसमुदायलाई आह्वान गरेको छ।’ 

सम्पत्ति शुद्धीकरणसम्बन्धी कसुरमा सोमबार सुर्खेतबाट पक्राउ गरिएका एमाले उपाध्यक्ष पौडेललाई मंगलबार विशेष अदालत (काठमाडौँ) ले सात दिन हिरासतमा राख्न अनुमति दिएको छ। 

यो पनि : ‘घर खानतलासी गर्न’ विष्णु पौडेल पत्नीलाई पत्र, प्रधानमन्त्री बालेनकै निर्देशनमा तत्काल पक्राउ