सीको भ्रमण आउने र जानेमा मात्रै सीमित हुँदैनः प्रचण्ड

नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले चिनियाँ राष्ट्रपतिको भ्रमणबाट बहुआयामिक लाभ हासिल गरिने बताएका छन्।

नेकपा चितवनले शुक्रबार माडीमा आयोजना गरेको दिवारक स्मृति ग्रन्थ विमोचन तथा दिवाकर भुसालको पूर्णकदको शालिक अनावरण समारोहलाई सम्बोधन गर्दै उनले राष्ट्रपति सी चीनफिङको भ्रमण नेपालका लागि उच्च महत्वको हुने बताए।

नेपाल, चीन र भारतमा यति बेला सशक्त र शक्तिशाली सरकार रहेको र यस्तो परिस्थितिमा हुन लागेको भ्रमण केवल केही समय आउने र जानेमा मात्र सीमित नहुने विश्वास व्यक्त गरे।

 फरक प्रसंगमा माडी क्षेत्रको विकासका लागि आफूले सरकार, निकुञ्ज र कर्मचारीसँंग छलफल गरिरहेको उनको भनाइ थियो। यस क्षेत्रको विकास संवेदनशील, महत्वपूर्ण र चुनौतिपूर्ण छ भन्दै उनले भने, ‘यस क्षेत्रको विकासका लागि जति चुनौती छ त्यति नै महत्वपूर्ण रहेको छ जसका लागि म निरन्तर लागिरहेको छु।’

अध्यक्ष प्रचण्डले पार्टीले छिट्टै महाअभियान सञ्चालन गर्ने तयारी गरिरहेको बताउँदै सम्पूर्ण नेता कार्यकर्ता र शुभचिन्तकलाई त्यसमा जुट्न आग्रह गरे।

कार्यक्रममा पार्टीका महासचिव विष्णु पौडेलले भुसाल एक आदर्श नेता मात्र नभएर कम्युनिस्टका धरोहर रहेको बताउँदै उनको आदर्श पूरा गर्न सिड्गो पार्टी लाग्नुपर्नेमा जोड दिए।

पार्टी प्रवक्ता नारायणकाजी श्रेष्ठले भुसालले समाज र पार्टीलाई छाडेर गएको आदर्शलाई व्यवहारमा उतार्दै अगाडि बढ्दा मात्र उनीप्रति सच्चा सम्मान हुने बताए। पार्टीको एकीकरण प्रक्रिया अन्तिम चरणमा पुगेको छ भन्दै उनले अब एकीकृत पार्टीका सारा शक्ति र सरकार राष्ट्र निर्माण लगाइने बताए।

कार्यक्रममा नेकपाका जिल्ला इञ्चार्ज कृष्ण खनाल, माडी नगरपालिकाका प्रमुख ठाकुरप्रसाद ढकाललगायतले भुसालको योगदानबारे चर्चा गरेका थिए। जिल्ला अध्यक्ष यमबहाहुर परियारको अध्यक्षतामा सम्पन्न कार्यक्रममा स्मृति ग्रन्थ तयारीमा लागेका पत्रकार नारायणप्रसाद सापकोटा र शालिक निर्माण टोलीलाई सम्मान गरिएको थियो।

यसअघि अध्यक्ष प्रचण्डले माडीको बघौडामा रहेको बघौडा अस्पतालको शल्यक्रिया भवन उद्घाटन गरेको थियो। सो अवसरमा उनले अस्पताललाई १५ शय्याबाट ५० शय्याको बनाउन पहल गरिने प्रतिबद्धता जनाए।