नेकपा एमालेले प्रतिनिधिसभातर्फ समानुपातिक निर्वाचन प्रणाली अन्तर्गत ३ लाख मत कटाएको छ। निर्वाचन आयोगका अनुसार बुधबार राति साढे ८ बजेसम्मको गाणनामा एमालेले ३ लाख मत कटाएको हो।
आयोगले प्रतिनिधिसभा समानुपातिकतर्फ एमालेको ३ लाख २२ हजार ७२ मत पुगेको जनाएको छ। उसलाई नेपाली कांग्रेसले २ लाख ८० हजार ७८ मतका साथ पछ्याइरहेको छ।
प्रतिनिधिसभा र प्रदेशसभा निर्वाचनको संघारमा अस्तित्वमा आएको दल राष्ट्रिय स्वतन्त्र पार्टी १ लाख ५१ हजार ५५१ मतका साथ समानुपातिकतर्फ तेस्रो स्थानमा छ।
उसलाई चौथो स्थानमा रहेको नेकपा माओवादी केन्द्र १ लाख ३६ हजार ८७६ मतसहित पछ्याइरहेको छ। राजतन्त्रको वकालत गर्दै आएको राष्ट्रिय प्रजातन्त्र पार्टी (राप्रपा) ७९ हजार ९९६ मत पाएर पाँचौं स्थानमा छ।
जनता समाजवादी पार्टी (जसपा) को २९ हजार १८९, नेपाल मजदुर किसान पार्टी (नेमकिपा) को २५ हजार ७०५, जनमत पार्टीको २२ हजार ५६२ मत आएको आयोगले जनाएको छ।
आयोगका अनुसार एमाले चोइटिएर बनेको नयाँ दल नेकपा एकीकृत समाजवादी १७ हजार ३५७ प्रतिनिधिसभा समानुपातिकतर्फ नवौं स्थानमा छ। उसलाई स्थानीय तह निर्वाचन अघि अस्तित्वमा आएको नागरिक उन्मुक्ति पार्टीले १४ हजार ५२९ मतसहित पछ्याइरहेको छ।
Shares
प्रतिक्रिया