सन्दीपको बयान : किशोरीले फोन काटेर म्यासेज पठाइन्, ‘डन्ट वरी म सेफ छु’

राष्ट्रिय टिमकै देव खनालसँग चिनजान भएकी किशोरीले सन्दीपमाथि बलात्कारको आरोप लगाएकी थिइन्। सन्दीपले पनि खनाल मार्फत नै ती किशोरीलाई चिनेको बयान दिएका छन्। देव खनालले सन्दीपसँग खिचेको फोटो ती किशोरीलाई पठाएका थिए। किशोरीले नै स्न्यापच्याटमा आफूलाई फ्रेन्ड रिक्वेस्ट पठाएको उनको बयान छ। टिमकै अन्य पनि उनीसँग साथी रहेको थाहा पाएपछि आफूले रिक्वेस्ट एसेप्ट गरेको सन्दीपको बयान छ। 

किशोरीले पटक पटक आफूलाई फोटो र भिडिओ पठाउने गरेको तर आफूले सामान्य उत्तर मात्रै दिने गरेको सन्दीपले बताएका छन्। कुराकानीकै क्रममा किशोरीले सन्दीपसँग एकदमै धेरै भेट्न खोजेको र आफूले समय छैन भनेको सन्दीपले बयानमा भनेका छन्। २ महिनापछि खेल सकेर फर्केपछि भेट्न भन्दा पनि बारम्बार म्यासेज गरी भेट्न कर गरेपछि दयनीय स्थितिमा रहेकाले केही सहयोग समेत चाहिएको भनेपछि भेटेको सन्दीपको बयान छ। 

‘तपाइँलाई भेटि केही व्यक्तिगत कुराहरु सेयर गर्न मन छ भनेकोमा मैले के भयो म के सहयोग गर्न सक्छु ? भनि म्यासेज गर्दा म भेटेर मात्रै भन्न सक्छु भनेको हुँदा ठिकै छ मलाई अहिले फुर्सद छैन फुर्सद मिल्यो भने भेटौंला भनेको थिएँ’, सन्दीपले बयान दिएका छन्, ‘भदौ ५ गते साँझ ४ बजेतिर किशोरीसँग फोनमा कुरा गरेको थिएँ। त्यतिबेला पनि भेट्न प्रस्ताव गरेकी थिइन्। तर मेरो केही मिटिङ थियो र म व्यस्त पनि भएकाले मैले निजलाई म आज अलि व्यस्त छु आज भेट्न सम्भव छैन भन्दा उनले काम सकेर आउनु म होस्टलमै पर्खिरहन्छु भनेकी थिइन्।’

साँझ मिटिङ सकिएपछि बेलुका ७ बजेतिर होस्टल जाने बाटो सोधेको तर उनले होस्टलको ठेगाना पनि नबताएको सन्दीपले भनेका छन्। त्यसपछि उनी लिटल काठमाडौं रेस्टुरेन्ट नजिकै कारमा कुरेर बसेका थिए। त्यसको २/३ मिनेटपछि किशोरी त्यहाँ पुगेकी थिइन्। 

किशोरी आएर गाडीमा बसेपछि आफूले के छ तिम्रो योजना भनेर सोध्दा उनले लेट्स गो टु नगरकोट भनेको तर आफूले नगरकोट जान सम्भव छैन बरु दरबारमार्ग जाउँ अनि कफि खाउँ भन्दा पनि आफूले बिहानैदेखि नगरकोट जाने मुड बनाएको किशोरीले बताएपछि आफू भोलि गेम खेल्न जाने भएकाले नमानेको सन्दीपले भनेका छन्। 

किशोरीले त्यसपछि पनि जिद्दि गर्दै एक छिन भएपनि नगरकोट पुगेर आउँ भनेर कर गरेपछि खाजा खाएर फिर्ता आउने सर्तमा गएको सन्दीपको बयान छ। 

‘उनको चित्त नदुखोस भनेर उनको कुरामा सहमती जनाएर नगरकोट गएका थियौं। उनको पूर्व तयारीको बारेमा मलाई केही जानकारी थिएन। बाटोमा कुरा हुँदा उनले आफू १२ कक्षामा पढिरहेको र १९ वर्षको भएको बताएकी थिइन्’, बयानमा सन्दीपले भनेका छन्, ‘भक्तपुरको दरबार स्क्वार पुग्दा पनि यतै कतै खाजा खाउँ भनेको थिएँ। तर उनले होस्टल जतिबेला पनि खुल्ला हुन्छ। मलाई नगरकोटबाट साँझको दृश्य अवलोकन गर्न मन छ भनेकाले नगरकोट गएका थियौं।’

बाटोमा देव खनाल र ती किशोरीको सम्बन्धका बारेमा पनि सन्दीपले सोधेका थिए। किशोरीले देव खनालको खेल मन परेकाले २०२२ मार्चमा सामाजिक सञ्जालबाट चिनजान भएको बताएकी थिइन्। नगरकोटमा उनीहरुबिच धेरै कुराकानी क्रिकेट र संगीतको बारेमा भएको बताएका छन्।
 
सन्दीपको पुरानै चिनजान रहेको बोजिनी रिसोर्टमा उनीहरु बसेका थिए। पहिले परिवार र साथीभाइहरुसँग नगरकोट जाँदा पनि सन्दीप त्यही होटलमा बस्ने गरेका थिए। बेलुका साढे ८ बजेतिर रिसोर्टमा पुगेका उनीहरुले संगीत सुन्दै खाजा खाएको बताएका छन्। सन्दीपले गाडीमा गितार पनि लगेका थिए। त्यही गितार लगेर गितार बजाउँदै रमाइलो गरेको सन्दीपले भनेका छन्। 

त्यसपछि सन्दीपले नै किशोरीलाई काठमाडौं फर्कौं भनेको बताएका छन्। होस्टल बन्द होला भन्दा पनि किशोरीले होस्टल जतिबेलासम्म पनि खुल्छ भनेको सन्दीपको दाबी छ। 

‘ढिला भए पनि केहि छैन, यतै बसौँला भन्ने कुरा गरेपछि मैले हुँदैन, तिम्रा साथीलाई तिमीले मसँग आएको छु भनी बताएकी छौ, फेरि हामी फर्किने गरी आएको, भोलि मेरो आफ्नो कामको तयारी गर्नुपर्ने छ, तिमी बुझ न भन्दा निजले सायद सन्दीप मसँग बस्दैन भनेर होला रिसले मुरमुरिएर मलाई गाडीको ढोका खोली दिनुस् भनेपछि मैले टाढैबाट गाडीको लक खोली दिएको थिए। उनी गाडीमा गएर बसिन्। म बिल तिर्न काउण्टरमा गएँ। बील तिरेपछि हामी दुवै जना राति ११ बजे रिसोर्टबाट हिँडेका थियौं’, सन्दीपको बयान छ। 

तर काठमाडौं फर्किएपछि ती किशोरीले होस्टल खुल्दैन भनेकी थिइन्। 

‘मैले पहिले किन खुल्छ भनेको त भनेको थिएँ। त्यतिबेलै किशोरीको मोबाइलमा कसैको फोन आएको थियो। फोन उठाइनन् र उनले म्यासेज गरिन् उसले मलाई लगिदिन्छ मेरो साथीकोमा म सुरक्षित छु। म भोलि बिहान आउँछु भनि म्यासेज पठाएकी थिइन्’, सन्दीपको बयानमा उल्लेख छ, ‘मैले किन यसरी झुट बोलेको कसैले थाहा पाए भने तिमिलाई नराम्रो सोच्छन् भन्दा डन्ट वरि, फेरि पनि होस्टलबाहिरबाट कसैले फोन गर्यो भने म होस्टलमा छु भन्छु र होस्टलभित्रबाट फोन आयो भने म साथीकोमा छु भन्छु। चिन्ता लिनु पर्दैन।’

‘तपाईसँग कुरा गर्नै पुगेको छैन। आज म तपाईसँग जान्छु। तपाईसँग धेरै कुरा गर्नु छ। मेरा केही व्यक्तिगत कुराहरु पनि गर्न बाँकी छ भनेपछि मैले हायात होटलमा जाउँ म त्यहीँ बस्दै आएको छु। म तिमिलाई एउटा कोठाको प्रबन्ध गरिदिन्छु, त्यही तिम्रा कुरा सुन्छु भनि प्रस्ताव राखेको थिएँ। उनले त्यहाँ सबै खेलाडीहरु हुन्छन्, देव पनि हुन्छ भन्दै आनाकानी गर्न थालिन्’, सन्दीपले भनेका छन्। 

त्यसपछि होटल काठमाडौं इनमा फोन गरेर एउटा कोठा बुक गरिदिएको र आफू पनि एकछिन बसेर जान्छु भनेको र किशोरीले पनि हुन्छ भनेको सन्दीपले दाबी गरेका छन्। होटल पुगेपछि आफू गाडी पार्किङ गरेर आउँदा किशोरीले होटलको कोठाको चाबि लिएर गइसकेको र त्यसपछि आफू पनि त्यही कोठामा गएको सन्दीपको भनाई छ। 

सुरुमा ४०७ नम्बर कोठामा गएपनि त्यहाँ एसी नचलेपछि होटलको स्टाफलाई फोन गरेर ३०५ नम्बरको कोठामा गएका थिए। सन्दीपले बताए अनुसार उनी गएर कुर्सीमा बसेपछि किशोरीले ढोका भित्रबाट बन्द गरेकी थिइन्। 

‘मैले किन ढोका लक गरेको भन्दा केही हुँदैन, इट्स ओके भन्दै जवाफ फर्काइन्’, सन्दीपले बयानमा भनेका छन्। 

त्यसपछि खेल जीवनका बारेमा कुराकानी हुँदा आफ्नो गर्लफ्रेण्ड पनि रहेको र आफूले १/२ वर्षमा बिहे गर्ने कुरा पनि बताएको उनले भनेका छन्। त्यसपछि ती किशोरीले आफ्नो बारेमा बताएकी थिइन्। आमाबाबुको सम्बन्ध बिच्छेदका कारण आफूले राम्रोसँग पढ्न नपाएको बताएकी थिइन्। 

‘कुराकानीको क्रममा निज उदास देखिएपछि मैले डन्ट वरी सब ठिक हुन्छ दुःखी नहोउ भनेको थिएँ। स्पोन्सरसिपको समेत कुरा हुँदा मैले ठिकै छ म हेरौंला के गर्न सकिन्छ भनेको थिएँ, उनी उदास भएपछि मैले गीत सुनाएँ त्यसपछि उनी खुसी भइन्’, सन्दीपले भनेका छन्। 

त्यसरात उनीहरुले करिव ४ बजेसम्म कुरा गरेका थिए। कुराकानीको क्रममा ती किशोरीले पहिले नै जन्मदर्ता बनाएको भएपनि पछि एक वर्ष उमेर घटाएर अर्को जन्मदर्ता बनाएको बताएको सन्दीपको दाबी छ। 

त्यसपछि उनीमाथी शंका लागेर आफू होटल फर्किन खोजेको सन्दीपको दाबी छ। तर किशोरीले नै अहिले गएर आउँदा एक घण्टा समय बित्ने भएकाले यहि बस्न भनेपछि कुराकानी गर्दै रातभर बसेको सन्दीपले बताएका छन्। किशोरीले एक्लै डर लाग्छ भन्दै आफूलाई पनि त्यही कोठामा बस्न आग्रह गरेको सन्दीपको भनाई छ। 

सन्दीपको बयानमा उल्लेख छ, ‘धेरै बेर कुर्सिमा बसेको देख्दा निजले मलाई बेडमा आएर बस्न समेत आग्रह गरेकोमा हैन म यहि ठिक छु भन्दै निजको आग्रहलाई अस्वीकार गरी कुर्चीमा बसे र निज बेडमै थिइन्। मैले मेरो मोबाइलमा बिहानको ६ बजे अलार्म लगाई कुराकानी गर्दा गर्दै म कुर्चीमा निदाएँ। बिहान अलार्म बजेपछि म निद्राबाट बिउँझिएर हेर्दा निज सुतेकी थिइन्, मैले निजलाई उठाएँ। बिहान ६ः४५ बजेतिर हामी होटलबाट निस्क्यौं।’

होटलबाट खुसी हुँदै दुवै जना सन्दीपकै गाडीमा बाहिरिएको पनि उनले भनेका छन्। किशोरीलाई होस्टलमा छाडेर सन्दीप होटल पुगेका थिए। केन्या गएको दिन पनि उनीहरुको कुरा भएको र सन्दीपले अब व्यस्त हुन्छु भनेको बताएका छन्। त्यसपछि कुराकानी हुन छाडेको थियो। भदौ २२ गते सामाजिक सञ्जाल मार्फत आफूविरुद्ध जाहेरी परेको कुरा थाहा पाएको सन्दीपले बयान दिएका छन्। 
अब मंगलबारदेखि जिल्ला अदालत काठमाडौं सन्दीपको बयान गराउने र थुनछेक बहस सुरु हुनेछ।