मोरङमा किशोरी हत्या गर्ने पूर्वप्रहरीको बयान : अर्कैलाई मार्न खोजेको थिएँ, उनलाई मारेछु

प्रहरीको जागिर छाडेका धीरेन २०७३ सालमा वैदेशिक रोजगारीका लागि कुवेत पुगे र त्यहाँ ४/५ वर्ष काम गरे। बीचमा एक पटक छुट्टिमा आएर गएका धीरेन ११ महिना पहिले नेपाल फर्किएका थिए।

धीरेनकी श्रीमती पनि वैदेशिक रोजगारीको सिलसिलामा कतारमा छिन्। पछिल्लो समय धीरेनको श्रीमतीसँग बोलचाल थिएन। श्रीमतीसँग सम्बन्ध बिग्रनु पहिले नै उनी ज्ञानमतीसँग नजिक भइसकेका थिए।

सुरुमा इमोबाट कुरा गरेका उनले पछि कुवेत हुँदा ज्ञानमतीकै नामको फेसबुक चलाउँथे। विदेशबाट फर्किएपछि उनले पथरी बजारमा पुगेर ज्ञानमतीलाई भेटे। त्यसको २०-२५ दिनपछि उनी फेरि ज्ञानमतीलाई भेटेर फर्किए।

त्यतिबेलासम्म उनीहरूको भागेर बिवाह गर्ने सल्लाह भइसकेको थियो। ज्ञानमती परिवारको सल्लाहबिनै धीरेनसँग भारत भाग्न तयार भइन्।

२०८० को असारमा उनीहरू जोगबनी नाका पुगे। तर उनीहरू भारत छिर्नै लाग्दा एउटा संस्थाले उनीहरूलाई पक्राउ गर्यो। धीरेनलाई प्रहरी कार्यालयमा बुझायो। ज्ञानमतीलाई संस्थाले नै राख्यो र परिवारलाई बोलाएर जिम्मा लगायो।

दुई दिन प्रहरी कार्यालयको हिरासतमा बसेर धीरेन छुटे। त्यसरी पक्राउ परेर छुटिसकेपछि भने उनीहरूको सम्पर्क टुट्दै गयो। तर परिवारलाई छलेर आकलझुकल कुरा गर्न भने छाडेका थिएनन्।

तर ज्ञानमतीका अविभावकले यो कुरा थाहा पाएपछि धीरेनलाई फोन गरेर आइन्दा ज्ञानमतीसँग कुरा गरेको थाहा पाएमा राम्रो नहुने चेतावनी दिएका थिए।

ज्ञानमतीका दाइले थर्काए पनि ज्ञानमती भने लुकीलुकी उनीसँग कुरा गर्थिन्। एक दिन ज्ञानमतीले गरेको फोन धीरेनका छोराले उठाए। ज्ञानमतीले उनलाई परिवारको बारेमा सोधिन् र उनी धीरेनको छोरा भएको थाहा पाइन्।

त्यसपछि उनीहरूको सम्बन्धमा थप खटपट आयो। लामो समयसम्म उनीहरूको कुरा भएन। धीरेनले यही बिचमा आफ्नो र ज्ञानमतीको फोटो फेसबुकमा पोष्ट गरे।

ज्ञानमतीले फोन गरेर त्यो फोटो डिलेट गर्न भनेकी थिइन्। ज्ञानमतीका परिवारले पनि धीरेनलाई ‘अझै कुरा गर्दैछौ?’ भन्दै थर्काएका थिए।

त्यसपछि भने आफूले ज्ञानमतीका परिवारका व्यक्तिको हत्या गर्ने योजनाले गएको धीरेनले अनुसन्धानमा खुलाएका छन्।

धीरेन सिमराबाटै खुकुरी झोलामा लिएर गएका थिए। सिमराबाट उनी फागुन १९ गते बेलुका झापाको बस चढेर गएका थिए। २० गते बिहान पथरी बजारमा झरे। त्यो दिनभरी त्यहीँ डुलेर बेलुका बास बस्न विर्तामोड पुगे।

भोलिपल्ट विर्तामोडतिरै घुमेर दिउँसो फेरि पथरी फर्किए। त्यहाँ आएर उनलाई निक्कै समय ज्ञानमती बस्ने दाइको सुम्निमा होटल पत्ता लगाउन लाग्यो। झमक्क रात परेपछि उनी उक्त होटल नजिक पुगे। होटल नजिकै रहेको सुँगुरको खोर नजिक लुकेर बसेका थिए।

राति शौचालयको ढोका खोलेको आवाज आयो। धीरेनले त्यतिबेला आफ्नो साथमा रहेको खुकुरी लिएर ढोका बाहिर ढुकिरहेका थिए। शौचालयमा जाने ज्ञानमतीकै दाजु भाउजु भएको आशंकामा पछाडीबाट प्रहार गरेका थिए।

त्यतिबेला कसको हत्या गरेँ भन्ने आफूलाई थाहा नभएको धीरेनले बयानमा भनेका छन्। तर हत्या गरेर उनी खुकुरी लिएर त्यहाँबाट भागेका थिए। केही पर पुगेर जमेको पानीमा उनले खुकुरी फालिदिए।

त्यहाँबाट खेतको डिलैडिल भाग्दै गर्दा प्रहरीले उनलाई पक्राउ गरेको थियो। पक्राउ परेपछि मात्रै आफूले ज्ञानमतीको हत्या गरेको थाहा पाएको उनले बयानमा भनेका छन्।

ज्ञानमतीको हत्या आरोपमा अहिले उनी कारागार पुगेका छन्।