कोसी र मधेसको पूर्वी क्षेत्रमा शीतलहर, पूरै तराईमा हुस्सु र कुहिरो

हाल देशमा पश्चिमी वायूको सामान्य प्रभाव रहेको छ।

यतिबेला (शनिबार बिहान) मधेस प्रदेशको पूर्वी भूभाग तथा कोसी प्रदेशको तराई भूभागमा मन्द शीतलहर चलिरहेको छ।  

बाँकी तराईका धेरै स्थानमा अहिले हुस्सु र कुहिरो लागेको छ। देशका पहाडी र हिमाली भूभागको मौसम भने मुख्यतया सफा रहेको मौसम पूर्वानुमान महाशाखाले जनाएको छ।

जल तथा मौसम विज्ञान विभागले २ दिनदेखि देशका तराई क्षेत्रमा दिनभर नै हुस्सु र कुहिरो लागिरहेको र यो क्रम माघ १३ गते (आइतबार) सम्म जारी रहने सम्भावना देखिएको जनाएको छ। घाम नलागेर दिनभरिनै शीतलहर र हुस्सु/कुहिरोको कारण चिसो बढ्दा तराई मधेसको जनजीवन कष्टकर बनेको छ। 

• विशेष बुलेटिनः मधेस र कोसीमा मन्द शीतलहर, १३ गतेसम्म सतर्क रहनू

विभागले शुक्रबार शीतलहरसम्बन्धी विशेष बुलेटिन जारी गरी माघ ९ गतेदेखि कोसी, मधेस, बागमती, गण्डकी र लुम्बिनी प्रदेशका तराई क्षेत्रमा दिनभरि हुस्सु र कुहिरो लागिरहेको जानकारी दिएको छ।
 
महाशाखाले आज बिहान छ बजे जारी गरेको बुलेटिनमा भनिएको छ, ‘मधेश प्रदेशको पूर्वी भूभाग (सप्तरी) तथा कोसी प्रदेशको तराई भूभाग (झापा, मोरङ र सुनसरी) मा अहिले मन्द शीतलहरको अवस्था रहेको र बाँकी तराईका धेरै स्थानमा पनि हुस्सु र कुहिरोको सम्भावना रहेकोले दैनिक जनजीवन, कृषि, शिक्षा, स्वास्थ्य, यातायात तथा हवाई उडानमा असर पर्न सक्ने हुनाले आवश्यक सतर्कता अपनाउनु हुन अनुरोध छ।’ 

कस्तो होला अबको ३ दिन देशभरको मौसम?