युनिकोड
दुबईबाट फर्किने यात्रुलाई ल्यापटप ओसार्न लगाएर भन्सारछली गरेको अरोपमा न्युरोडका एक व्यापारीसहित ७ जना पक्राउ परेका छन्।
न्युरोडको संकटा मन्दिरनजिक रहेको एलिटेड सप्लायर्स प्रालिबाट यसरी भन्सार छली गरेर ल्याएका डेल कम्पनीका ७२ थान ल्यापटप पनि प्रहरीले बरामद गरेको छ।
पक्राउ पर्नेमा एलिटेड सप्लायर्सका सञ्चालक मोरङको विराटनगर महानगरपालिका १५ घर भई हाल काठमाडौँको कंलकी बस्ने ३० वर्षका रसिद आलम, मकवानपुर राक्सीराङ गाउँपालिका ९ घर भई हाल सितापाइला बस्ने २६ वर्षका चित्रबहादुर मल्ल ठकुरी, सोही ठाउँका २४ वर्षका हुकुमबहादुर मल्ल र उदयपुरको कटारी नगरपालिका-५ घर भई हाल बौद्ध बस्ने ३१ वर्षका सुमीत केसी रहेका छन्।
उनीहरू तीनै जना दुबईबाट ल्याएका सामान लिन होटलसम्म पुगेका थिए। दुबईबाट ल्यापटप लिएर आउने महोत्तरी बलवा नगरपालिका १२ का २८ वर्षका राकेश गिरी, पाल्पा रम्भा गाउँपालिका १ का ४१ वर्षका तारा बहादुर रेस्मी मगर र पाँचथरको मिक्लाजुङ गाउपालिका ३ की ३५ वर्षकी कमला फियाक रहेका छन्।
भन्सार छल्नका लागी व्यापारीले दुबईबाट आउने यात्रुलाई एउटा ल्यापटप र एउटा मोबाइल पठाउने गरेको खुलेको छ। यसरी विदेशबाट आउनेलाई एउटा नयाँ ल्यापटप र एउटा मोबाइल ल्याउँदा सरकारले भन्सार छुट दिएको छ।
दुबईबाट छुट्टा छुट्टै उडानमा सोमबाार नेपाल फर्किएका तीन जना बत्तीसपुतलीबाट पक्राउ परेको अपराध अनुसन्धान कार्यालयका एसपी अंगुर जिसीले जानकारी दिए।
दुबईबाट फर्किने यात्रुले ल्याएका ल्यापटप बुझ्न गएका तीन जनालाई पनि प्रहरीले त्यहीँ पक्राउ गरेको थियो। प्रारम्भिक अनुसन्धानमा ती सामान एलिटेड सप्लायर्समा लैजाने गरेको खुलेपछि प्रहरीले त्यहाँ छापा मारेको थियो। पसल सञ्चालक आलमले पहिलेदेखि नै यसरी सामान ल्याएर बेच्ने गरेको खुलेको एसपी जीसीले बताए।
प्रहरीले पसल तथा स्टोरमा खानतलासी गर्दा बिल नभएका डेल कम्पनीका ६९ थान ल्यापटप र २ थान मोबाइद्य बरामद गरेको हो। बरामद भएका सामानसहित सातै जनालाई थप अनुसन्धान एवम् कारबाहीको लागि त्रिभुवन बिमानस्थल भन्सार कार्यालय पठाएको छ।
प्रतिक्रिया