ट्रकको ठक्करबाट ८४ वर्षीया वृद्धाको मृत्यु, २५ वर्षीय चालक पक्राउ

पूर्व–पश्चिम राजमार्गअन्तर्गत मकवानपुरको मनहरी गाउँपालिका–७ निर्मलबस्तिमा ट्रकको ठक्करबाट आज बिहान एकजना पैदलयात्रीको मृत्यु भएको छ।

चितवनबाट हेटौँडा आउँदै गरेको ना.८ ख १२५६ नम्बरको ट्रकले ठक्कर दिँदा पैदलयात्री स्थानीय ८४ वर्षीया ईन्द्रकुमारी स्याङतानको मृत्यु भएको हो। 

जिल्ला प्रहरी कार्यालयका प्रवक्ता एवं प्रहरी नायव उपरीक्षक पुष्कर बोगटीका अनुसार ट्रकको ठक्करबाट गम्भीर घाइते भएकी स्याङतानको हेटौँडा अस्पतालमा उपचारको क्रममा मृत्यु भएको हो। 

ठक्कर दिने ट्रक चालक धनुषाको मिथिला नगरपालिका–६ का २५ वर्षीय सञ्जितकुमार महतोलाई नियन्त्रणमा लिएर थप अनुसन्धान अघि बढाइएको प्रहरीले जनाएको छ। रासस