युनिकोड
लुम्बिनी लायन्सका कन्सल्ट्यान्ट प्रशिक्षक शक्ति गौचनले आजको खेलमा केही गल्ती हुँदा खेल हारिएको बताउँदै आगामी खेलमा सच्याउने बताएका छन्।
सिद्धार्थ बैंक नेपाल प्रिमियर लिग (एनपीएल)मा शनिबार लुम्बिनी कर्णाली याक्ससँग नौ विकेटले पराजित भएको थियो। खेलपछि कुराकानी गर्दै गौचनले ब्याटिङ, बलिङ र फिल्डिङमा केही कमजोरी भएको बताए।
गौचनले भने, ‘पावर प्लेमा पनि हामी चुक्यौँ। फिल्डिङ पनि राम्रो हुन सकेन। केही क्याच छोड्यौँ। त्यसले गर्दा आजको म्याच हारियो। अर्को म्याचमा सुधार गर्छौँ।’
कर्णालीका कप्तान सोमपाल कामी र अन्य बलरले राम्रो बलिङ गरेको बताए। त्यससँगै कर्णालीका ब्याटर मार्क वाटको पनि प्रशंसा गरे। वाटले शतक प्रहार गरेका थिए। ‘वाटले राम्रो क्रिकेट खेले। शतक प्रहार गरे। शतक भनेको जहिले पनि विशेष हुन्छ,’ उनले भने।
लुम्बिनीले अन्तिम पाँच ओभरमा ठिकै गरेकाले सम्मानजनक स्कोर पुगेको उनको भनाइ थियो। दुई खेलमा एउटा खेल हारेकाले अहिले नआत्तिन समर्थकलाई आग्रह गरे। ‘अहिले आत्तिनुपर्दैन। दुई वटा मात्रै खेल भएका छन्,’ गौचनले भने, ‘आजको खेलमा जुन गल्ती भएका छन्, ब्याटिङ, बलिङ र फिल्डिङमा, आगामी खेलमा सच्याएर अघि बढ्छौँ।’
यो पनि पढ्नुहोस् : लुम्बिनीको लज्जास्पद हार, मार्क वाटको शतकमा कर्णालीको सहज जित
प्रतिक्रिया