युनिकोड
भारतीय अर्बपति गौतम अदानीले चीन एक्लिँदै गएको बताएका छन् । उनले आगामी दिनमा चीनले यसको अझै बढ्दो एक्लोपना महशुस गर्ने बताएका छन् ।
मंगलबार सिंगापुरमा आयोजित एक सम्मेलनमा बोल्दै अदानीले बढ्दो राष्ट्रियतावाद, आपूर्ति शृंखलाको जोखिम र प्राविधिक कडाइसँगै बेइजिङको बेल्ट एन्ड रोड इनिसिएटिभविरुद्धका गतिविधिले विश्वमञ्चमा चीनको भूमिका प्रभावित हुने बताएका हुन् ।
एसियाकै धनी अदानीले विश्वको दोस्रो ठूलो अर्थतन्त्रमा घरजग्गा क्षेत्रमा देखिएको जोखिमले सन् १९९० को दशकको हराएको दशकका दौडान जापानी अर्थतन्त्रमा भएजस्तै हुने भन्दै तुलना गरेका थिए । अदानीले विश्वकै तेस्रो ठूलो धनी भएको महिना दिन बितेको छैन । उक्त स्थान पाउने अदानी पहिलो एसियाली धनाढ्य हुन् । उनी अदानी ग्रुपका संस्थापक हुन् भने उनको बन्दरगाहदेखि ऊर्जा क्षेत्रसम्ममा विभिन्न कम्पनीमा लगानी छ ।
चीनप्रति निराशावादी धारणा राखेका उनले आफ्नो देशको भने मजाले तारिफ गरे । भारत राजनीतिक, भूरणनैतिक र बजारका हिसाबले राम्रामध्ये एक लगानीको क्षेत्र रहेको दाबी गरे । उनको अनुमानअनुसार भारत २०३० सम्ममा विश्वको तेस्रो ठूलो अर्थतन्त्र बन्नेछ । उनले केही प्रविधि कम्पनीहरुले चिनियाँ निर्भरता तोड्दै भारतप्रति आकर्षित भइरहेको उनको भनाइ छ ।
सोमबार मात्रै एप्पलले आईफोन १४ भारतमा उत्पादन गर्ने निर्णय गरेको थियो । आपूर्ति शृंखलालाई विविधीकरण गर्न यस्तो आवश्यक रहेको बहुराष्ट्रिय कम्पनीहरुले बताउँदै आएको छ । सीएनएनबाट
प्रतिक्रिया