समयमै टेन्डर अवार्ड गरी पासपोर्टको समस्या समाधान गर्छौँ, अभाव हुन दिँदैनौँ : राहदानी विभाग

राहदानी विभागले पासपोर्ट अभाव नहुने गरी ठेक्का लगाउने बताएको छ।

मंगलबार पत्रकार सम्मेलन गर्दै समयमै टेन्डर अवार्ड गरी पासपोर्टको समस्या समाधान गर्ने प्रतिबद्धता जनाएको हो।

महानिर्देशक तीर्थराज अर्यालले राहदानी विभागसँग १० लाख २१ हजार ७०० पासपोर्ट बाँकी रहेको बताउँदै उक्त पासपोर्टले करिब १ वर्ष पुग्ने बताए।

राहदानी विभागले नोभेम्बर २८ मा टेन्डर आह्वान गरेको थियो। सुरुमा जनवरी १२ गतेसम्म म्याद दिइएकोमा विवाद भएसँगै फेब्रुअरी ११ सम्म म्याद थप गरेको छ। विभागले टेन्डर डकुमेन्टमा संशोधन गरेपछि फेरि म्याद थप गर्नुपर्ने भन्दै सार्वजनिक खरिद अनुगमन कार्यालयमा उजुरी परेको छ।

कार्यालयले प्रतिस्पर्धा बढ्ने भए म्याद थप गर्न विभागलाई निर्देशन दिएको छ। तर महानिर्देशक अर्यालले म्याद थपको सम्भावना कम रहेको बताए।

‘२०२५ को डिसेम्बरसम्म नयाँ ठेक्का लगाई पासपोर्ट छपाइ गर्न तयार भइसक्नुपर्छ’, उनले भने, ‘हामीले कम्पनीहरुको मागअनुसार १ महिना म्याद थप गरिसकेका छौँ। अब म्याद थप हुने सम्भावना कम छ।’

म्याद थप भए मंगलबार साँझसम्म हुने उनले जानकारी दिए। विभागले आइडेमियासँग गरेको ठेक्काअनुसार २०२५ डिसेम्बरसम्म सम्झौता अवधि छ।

थप समाचार-