प्रकाश र परीक्षाको मुख्य भूमिकामा बन्ने फिल्म ‘सोल्टिनी’को छायांकन सुरू

प्रकाश सपुत र परीक्षा लिम्बुको मुख्य भूमिका रहेको फिल्म ‘सोल्टिनी’ को छायांकन सुरु गरिएको छ। मङ्गलवार इलामको रोङमा रहेको सानो पाथीभरा मन्दिरमा शुभ मुहूर्त गर्दै ३१ दिनको तालिकासहित छायाङ्कन सुरु भएको निर्देशक अर्जुन सुवेदीले बताए।

अभिनेता प्रकाश, अभिनेत्री द्वय परीक्षा र सब्बु गुरुङ तथा कलाकार सुन्दर धितालले मन्दिर परिसरमा नै चलचित्रको लागि पहिलो र महत्त्वपूर्ण सट दिए। यो फिल्म इलाम तथा भोजपुरको रमणीय प्राकृतिक सौन्दर्यमा छायाङ्कन हुनेछ।

यस फिल्ममा विल्सन विक्रम राई, रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, सुजन खतिवडा रहेका छन्। सपूतले भीमसेन पोखरेल र लिम्बुले दिलासा राईुको मुख्य भूमिका निभाउने चलचित्रको घोषणामा नै बताइएको थियो। यो जोडी पहिलो पटक एकसाथ पर्दामा देखिन लागेको हो।

यस चलचित्रले समाजमा व्याप्त अमानवीयता र जातीय भेदभावका विरुद्ध आवाज उठाउनेछ । साथै, दुई प्रमुख पात्रबीचको प्रेम कथा पनि यसको मुख्य आकर्षण रहनेछ।

चलचित्रको सङ्गीत प्रशान्त सिवाकोटी र हर्कुलस बस्नेतले दिएका छन् भने छायाङ्कन सुशन प्रजापतिले गर्नेछन्। प्लानेट थ्री फिल्म्सको प्रस्तुति तथा नेपसिने र योलो इन्टरटेन्मेन्टको सहकार्यमा बन्न लागेको यो चलचित्रका निर्माताहरू रेजिना बिस्ट र संसार चौलागाईँ हुन्।

ट्राइडेन्ट कन्सेप्टले पब्लिसिटी डिजाइन गर्नेछ भने आरआर फिल्मस् प्रा।लि।ले नेपाल र नेपसिनेले विदेश वितरण गर्नेछन्। डिजिटल अधिकार ओएसआर डिजिटलले खरिद गरेको छ।

चलचित्रलाई २०८२ सालको असोज ३ गते संविधान दिवसको दिन रिलिज गर्ने लक्ष्य राखिएको छ।