ओपनिङभन्दा बढी नवौं दिनमा अनमोल स्टारर ‘जेरी अन टप’ को कमाइ

गत असोज ३१ गतेबाट रिलिज भएको फिल्म  ‘जेरी अन टप’ ले आक्रामक व्यापार गरिरहेको छ। रिलिजको पहिलो दिनबाट राम्रो कमाइ गरिरहेको फिल्मले प्रदर्शनको नवौं दिनमा १ करोड माथिको ग्रस व्यापार गरेको छ। 

दोस्रो साताको व्यापारमा एकै दिन करोड माथिको कलेक्सन गरेको हो। निर्माता सरोज न्यौपानेका अनुसार चलचित्रले शनिबार मात्रै १ करोड १ लाख ३२ हजार  कलेक्सन गरेको छ। चलचित्र विकास बोर्डले उपलब्ध गराएको रियल टाइम बक्सअफिस रिपोर्ट सार्वजनिक गर्दै न्यौपानेले आफ्नो चलचित्रले प्रदर्शनको नवौं दिनमा एकै दिन १ करोडको क्रस गरेको जानकारी दिए।

चलचित्र विकास बोर्डको बक्सअफिस रिपोर्टअनुसार फिल्मले पहिलो दिन ७२ लाख ५९ हजार ४०८ रुपैयाँ ओपनिङ गरेको थियो। दोस्रो साताको शनिबार १ करोड कमाउँदै फिल्मले बलियो पकड  समातेको छ। 

आइतबार पनि चलचित्रप्रति दर्शक क्रेज राम्रो देखिएको छ। काठमाडौंसँगै मोफसलमा प्रमुख शहरदेखि ग्रामिण भेगमा हलहरूमा समेत फिल्मप्रति दर्शक आकर्षण उच्च देखिएको छ।