युनिकोड
अभिनेत्री नीता ढुंगानाको डेब्यु निर्देशनमा बनेको फिल्म ‘पार्वती’ को पहिलो झलक सार्वजनिक गरिएको छ। निर्माण पक्षले शुक्रबार एक कार्यक्रमको आयोजना गर्दै दुईवटा पोस्टर सार्वजनिक गरेको हो।
सार्वजनिक भएका यस चलचित्रका दुईवटा पोस्टरले दर्शकमाझ कौतुहलता पैदा गरेको छ। यी पोस्टरहरूले नीतालाई एउटा भिन्न र चुनौतीपूर्ण चरित्रमा उभ्याएको छ।
जसमध्य एक पोस्टरमा नीता ढुंगाना स्कुले छात्राको पोसाकमा देखिन्छिन्। जहाँ उनलाई छोटो कपाल घाँटीमा कालो धागो र नीलो फ्रक (पिनाफोर) मा उनी एक सामान्य विद्यार्थीभन्दा केही फरक देखिन्छिन्।
यसले उनको पात्र ‘पार्वती’ कुनै विशेष मानसिक वा सामाजिक अवस्थाबाट गुज्रिरहेको संकेत गर्छ। उनको हेराई र मुस्कानमा एउटा अलग्गै खालको इन्नोसेन्स (निर्दोषता) देखिन्छ। यसले पार्वती समाजले सोचेजस्तो 'सामान्य' पात्र नभएर आफ्नै संसारमा रमाउने पात्र भएको दर्शाउँछ।
अर्को पोस्टरमा बालगायक तथा कलाकार अशोक दर्जीले नीतालाई पिठ्युँमा बोकेका छन्। दुवैको अनुहारमा झल्किने हाँसोले उनीहरूबीचको सम्बन्धमा कुनै स्वार्थ नभएको र यो एक शुद्ध भावनात्मक कथा भएको पुष्टि गर्छ । नीताले आकाशतर्फ देखाएको औँलाले पात्रका ठूला सपना वा कल्पनाशीलताको प्रतिनिधित्व गर्छ।
दोस्रो पोस्टरको पृष्ठभूमिमा भित्ताभरि चकले 'माया', 'परिवार', 'स्नेह', 'किरण' जस्ता शब्दहरू लेखिएका छन्। यसले चलचित्रको मूल भाव र यो स्कुल वा शिक्षाको परिवेशमा बुनिएको कथा हो भन्ने स्पष्ट पार्छ ।
यो फिल्म रक्षाबन्धनको अवसरमा भदौ १२ मा प्रदर्शन हुने छ। पोस्टरमा दिदी-भाइ जस्तो देखिने सम्बन्धलाई चित्रण गरिनु र रिलिजका लागि रक्षाबन्धन रोजिनुले यो चलचित्र दिदी-भाइको भावनात्मक सम्बन्ध र सामाजिक दायित्वमा केन्द्रित हुने देखिन्छ ।
यो चलचित्र नीताका लागि एउटा ठूलो जोखिम र अवसर दुवै हो। कथा, पटकथा, निर्देशन र मुख्य भूमिका आफैँले सम्हाल्नुले उनले यो फिल्मलाई एउटा 'ड्रिम प्रोजेक्ट' को रूपमा लिएको बुझिन्छ ।
यस चलचित्रमा नीता र अशोकसहित दीपाश्री निरौला, सिरु बिष्ट, राधिका कँडेल, राज पंगेनी शर्मा, राजेन्द्र नेपाली, आशा पौडेल लगायतको अभिनय छ। नीता ढुंगाना फिल्म्सको प्रस्तुतिमा निर्माण भएको यो चलचित्रका निर्माता हरिहर अधिकारी हुन्। विभिन्न सफल चलचित्र खिचिसकेका छायांकार सुदिप बरालको डिओपी रहेको यस चलचित्रको संवाद शिवम् अधिकारीले तयार पारेका हुन् ।
यस चलचित्रमा सरोज अधिकारी क्रियटिभ निर्देशक रहेका छन्। सरोज कार्टुन क्रुका डान्सर तथा निर्देशक हुन्। उनी पहिलो पटक यस चलचित्रमा क्रियटिभ निर्देशकका रुपमा काम गर्न लागेका हुन्।
यस चलचित्रमा प्रोडक्सनको काम शंकर पाण्डेले हेर्दैछन्। चलचित्रमा उनी नै कार्यकारी निर्माता पनि छन् । चलचित्रमा साहिल खानको सम्पादन रहने छ। युवराज काफ्ले, हर्क साउद, बाबुल गिरी र सिद्धार्थ सरकार पौडेलको गीत रहने यो चलचित्रमा प्रशान्त सिवाकोटी, बाबुल गिरी, सिद्धार्थ सरकार पौडेल र दीपक शर्माको संगीत रहने छ।
प्रतिक्रिया