ओटीटीमा आयो दयाहाङ र मिरुनाको ‘जारी २’

हिट फिल्म ‘जारी २’ नेपालकै ओटीटी प्लाटफर्म ‘सिनेमाघर’मार्फत सार्वजनिक गरिएको छ। दर्शकहरूलाई घरमै बसेर नयाँ चलचित्र हेर्ने उत्कृष्ट सुविधा दिने उद्देश्यका साथ सिनेमाघरले यो चलचित्र विश्वभर एकसाथ स्ट्रिमिङमा ल्याएको हो।

अब स्वदेश तथा विदेशमा रहेका जोकोही दर्शकले एचडी क्वालिटीमा मात्र १९९ र फोरके क्वालिटीमा २९९ रुपैयाँ तिरेर यो फिल्म हेर्न सक्नेछन्। 

नेपाली चलचित्र ‘जारी २’ पूर्वी नेपालको लिम्बु समुदायको संस्कृति र जारी प्रथामा आधारित छ। यस चलचित्रलाई उपेन्द्र सुब्बाले लेखन तथा निर्देशन गरेका हुन् भने बाँसुरी फिल्म्सको ब्यानरमा रामबाबु गुरुङ र उनको समूहले यसको निर्माण गरेका हुन्।

यो चलचित्र बक्स अफिसमा निकै सफल भएको ‘जारी’  चलचित्रको दोस्रो श्रृंखला हो। यस फिल्ममा दयाहाङ राई, मिरुना मगर र विजय बराल जस्ता चर्चित कलाकारहरू मुख्य भूमिकामा रहेको छ। फिल्मले लिम्बु संस्कृति, उनीहरूको परम्परागत च्याब्रुङ नाच र पुरानो कालखण्डको कथालाई निकै सुन्दर ढंगले पर्दामा प्रस्तुत गरेको छ।