युनिकोड
शुक्रबार दुबईमा भएको एयर सोका क्रममा भारतीय वायुसेनाको तेजस लडाकु विमान दुर्घटना भयो। जसमा पाइलट विङ कमान्डर नमांश स्यालले ज्यान गुमाए।
स्थानीय समय अनुसार शुक्रबार दिउँसो २ बजे दुबईको अल मकतुम अन्तर्राष्ट्रिय विमानस्थलमा विमान खसेको थियो।
दुर्घटनाको भिडिओ सामाजिक सञ्जालमा भाइरल भएको छ।
भिडिओमा तेजस विमान उडेको केही समयपछि जमिनमा खसेको र आगोको ज्वाला र धुवाँको मुस्लोसहित विस्फोट भएको देखिन्छ।
जसमा थिए- पाइलट नमांश स्याल। घटनास्थलमै उनको मृत्यु भयो। उनी हिमाचल प्रदेशको कांगडा जिल्लाका बासिन्दा भएको भारतीय सञ्चारमाध्यमले जनाएका छन्।
हिमाचल प्रदेशका मुख्यमन्त्री सुखविन्दर सिंह सुखुले ट्विटरमा विङ कमान्डर नमांशको तस्बिर पोस्ट गर्दै लेखेका छन्, ‘दुबई एयर सोमा तेजस विमान दुर्घटनामा हिमाचल प्रदेशको कांगडा जिल्लाका एक बहादुर छोरा नमांश स्यालको मृत्युको खबर अत्यन्तै दु:खद र हृदयविदारक छ।’
‘देशले एक बहादुर, समर्पित र साहसी पाइलट गुमाएको छ। म शोकसन्तप्त परिवारप्रति गहिरो समवेदना व्यक्त गर्दछु। बहादुर छोरालाई सलाम, राष्ट्रको सेवाप्रतिको अदम्य बहादुरी, समर्पण र समर्पणलाई हृदयदेखि नमांश।’
दुर्घटनाबारे विज्ञप्ति जारी गर्दै भारतीय वायुसेनाले भनेको छ, ‘शुक्रबार दुबई एयर सोमा एरोबेटिक प्रदर्शनका क्रममा भारतीय वायुसेना (आईएएफ) को तेजस विमान दुर्घटना भयो। दुर्घटनामा पाइलटले ज्यान गुमाए। भारतीय वायुसेना यस अपूरणीय क्षतिमा गहिरो समवेदना व्यक्त गर्दछ र शोकको यस घडीमा शोकसन्तप्त परिवारका साथ दृढतापूर्वक उभिएको छ। दुर्घटनाको कारण पत्ता लगाउन कोर्ट अफ इन्क्वायरी गठन गरिएको छ।’
प्रतिक्रिया