युनिकोड
अन्तर्राष्ट्रिय आणविक ऊर्जा एजेन्सी (आईएईए) ले उत्तर कोरियाको आणविक हतियार उत्पादन क्षमतामा ‘धेरै गम्भीर वृद्धि’ भइरहेको चेतावनी दिएको छ। उसका अनुसार पछिल्ला निरीक्षण र मूल्यांकनले देशको संवर्धन तथा पुनःप्रशोधन गतिविधि तीव्र रूपमा बढिरहेको देखाएका हुन्।
आईएईएका महानिर्देशक राफाएल ग्रोसीले बुधबार सियोलमा पत्रकार सम्मेलन गर्दै उत्तर कोरियाले आणविक हतियार विकासतर्फका प्रमुख संरचना सक्रिय रूपमा विस्तार गरिरहेको बताएका हुन्।
उनका अनुसार यो परिवर्तनले उत्तर कोरियाको रणनीतिक क्षमता उल्लेखनीय रूपमा बढिरहेको संकेत गर्छ।
दक्षिण कोरियाको गुप्तचर निकायका अनुसार कूटनीतिक रूपमा अलग रहेको उत्तर कोरियाले युरेनियम संवर्धनका लागि धेरै सुविधा सञ्चालन गरिरहेको अनुमान गरिएको छ, जुन आणविक हतियार निर्माणको अत्यन्त महत्त्वपूर्ण चरण हो।
तीमध्ये योङब्योन परमाणु स्थल पनि समावेश छ, जसलाई प्योङयाङले अघिल्ला वार्तापछि निष्क्रिय बनाएको दाबी गरेको थियो तर सन् २०२१ मा पुनः सक्रिय गरिएको बताइन्छ।
ग्रोसीका अनुसार आईएईएले आफ्नो आवधिक मूल्यांकनका क्रममा योङब्योन रिएक्टरको सञ्चालनमा तीव्र वृद्धि भएको पुष्टि गरेको छ।
साथै पुनःप्रशोधन एकाइ र हल्का पानी रिएक्टरमा पनि गतिविधि बढेको देखिएको छ भने अन्य सम्बन्धित संरचनासमेत सक्रिय अवस्थामा रहेको पाइएको छ।
उनले भने, ‘यी सबै गतिविधिले उत्तर कोरियाको आणविक हतियार उत्पादन क्षमतामा निकै गम्भीर वृद्धि भएको संकेत गर्छ, जसको अनुमानित संख्या केही दर्जन हतियारसम्म पुग्न सक्छ।’
उत्तर कोरियाले सन् २००६ मा पहिलो आणविक परीक्षण गरेयता लगातार आफ्नो प्रतिबन्धित आणविक कार्यक्रम विस्तार गरिरहेको छ।
संयुक्त राष्ट्रसंघीय प्रतिबन्धका बाबजुद प्योङयाङले आफ्नो आणविक हतियार कहिल्यै त्याग्ने छैन भन्ने अडान दोहोर्याइरहेको छ।
यसैबिच उत्तर कोरियाको आणविक विकासमा रूसको सम्भावित भूमिकासम्बन्धी प्रश्नमा ग्रोसीले आईएईएले हालसम्म त्यसबारे कुनै ठोस प्रमाण नदेखेको बताएका छन्।
यद्यपि विश्लेषकहरूका अनुसार उत्तर कोरियाले युक्रेनमा रुसको सैन्य अभियानलाई समर्थन गर्न सैनिक र तोपखाना सहयोग पठाएको छ भने त्यसको बदलामा मस्कोबाट सैन्य प्रविधि सहायता प्राप्त गरिरहेको आशंका छ।
यस्तो पृष्ठभूमिमा उत्तर कोरियाको आणविक कार्यक्रम थप संवेदनशील अन्तर्राष्ट्रिय मुद्दा बनेको देखिन्छ।
प्रतिक्रिया