राष्ट्रिय सभा निर्वाचनमा प्रदेश २ बाट उम्मेदवारी दर्ता गर्न गएका लोकतान्त्रिक समाजवादी दलका श्यामसुन्दर सरदार उम्मेदवारी दिनबाट बञ्चित बनेका छन्।
उनी उम्मेदवारी दर्ता गराउन पुगे पनि आर्थिक लाभ लिने पदमा कार्यरत रहेको र प्रदेश सभाको समानुपातिक तर्फको बन्द सूचीमा उनको नाम रहेकाले उनी उम्मेदवार बन्न नसकेको प्रदेश २ का निर्वाचन अधिकृत पुष्पा झाले जानकारी दिइन्।
सप्तरीको कञ्चनरुप निवासी सरदार प्रदेश २ सरकारले २०७८ फागुन ६ मा गठन गरेको दलित विकास समितिका सदस्य समेत हुन्। उनले सो समितिबाट आर्थिक लाभ लिइरहेका छन्।
राष्ट्रिय सभा निर्वाचन निर्देशिकामा आर्थिक लाभको पदमा रहेका व्यक्तिले उम्मेदवारी दिन नपाउने व्यवस्था छ।
श्यामसुन्दर सरदार उम्मेदवारीबाट बञ्चित भएपछि प्रदेश २ मा राष्ट्रियसभाको २ पदका लागि ४ दलबाट ५ जनाको उम्मेदवारी परेको छ।
प्रदेशमा पाँच दलीय गठबन्धन, एमाले र लोकतान्त्रिक समाजवादी दलबीच चुनावी प्रतिस्पर्धा हुने छ।
Shares
प्रतिक्रिया