समानुपातिक : बाजुरा र दोलखाको मत मात्र गन्न बाँकी, हेर्नुहोस् ताजा सूची

यही मंसिर ४ मा भएको प्रतिनिधिसभा सदस्य तथा प्रदेशसभा सदस्य निर्वाचनअन्तर्गत जारी मत गणना अब सकिने चरणमा पुगेको छ।

यो खबर तयार पार्दासम्म प्रतिनिधिसभा प्रत्यक्षतर्फका १६५ सिटमध्ये १६३ वटाको अन्तिम परिणाम सार्वजनिक भइसकेको छ।

प्रतिनिधिसभाका १६३ क्षेत्रको नतिजा सार्वजनिक, कुन दलले कति सिट जिते?

अब बाजुरा र दोलखाको नतिजा आउन मात्र बाँकी छ। त्यहाँ मत गणना जारी छ।

प्रतिनिधिसभा समानुपातिकतर्फ पनि यिनै दुई जिल्लाको मत मात्र जोड्न बाँकी रहेको निर्वाचन आयोगका सूचना अधिकारी एवं सहायक प्रवक्ता सूर्यप्रसाद अर्यालले जानकारी दिए।

‘बाजुरा र दोलखाको मत विवरण हामी (निर्वाचन आयोग) कहाँ आइपुगेको छैन। यी दुई जिल्लाको समानुपातिक मत इन्ट्री गर्न बाँकी छ,’ सहायक प्रवक्ता अर्यालले आइतबार बिहान नेपालखबरसँग भने।

उनका अनुसार समानुपातिकतर्फ अब दोलखामा ८० हजारभन्दा केही बढी रर बाजुरामा ६५–७० हजारजति मत हुने अनुमान गरिएको छ। अहिलेसम्म गणना गरिएको समानुपातिक मतमध्ये १ करोड ४ लाख २० हजार १ सय २५ मत सदर भएको आयोगको तथ्यांकले देखाएको छ।

प्रतिनिधिसभा समानुपातिकतर्फ अहिलेसम्म सात दलले मात्र थ्रेसहोल्ड कटाएर राष्ट्रिय दलको मापदण्ड पूरा गरेका छन्। आयोगका अनुसार नेकपा एमाले, नेपाली कांग्रेस, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी र जनमत पार्टीले राष्ट्रिय दलको मान्यता पाइसकेका हुन्।

लगभग डेढ लाख मत गन्न बाँकी रहँदा सत्तारुढ नेकपा एकीकृत समाजवादी पनि थ्रेसहोल्ड कटाउने संघर्ष गरिरहेको छ। यो खबर तयार पार्दासम्म उसले ३ लाख ९४ हजार ५ सय २३ समानुपातिक भोट ल्याएको छ।

आयोगका सहायक प्रवक्ता अर्यालका अनुसार अहिलेसम्मको आकलनले थ्रेसहोल्डको सीमा ३ लाख १७–१८ हजार मतमा पुग्ने देखिएको छ।

कूल सदर मतको ३ प्रतिशत मतलाई थ्रेसहोल्डको सीमा तोकिएको छ। प्रत्यक्षतर्फ कम्तीमा एक सिट जितेको दलले थ्रेसहोल्ड कटाए राष्ट्रिय दलको मान्यता पाउँछन्। प्रत्यक्षतर्फ एउटा पनि सिट नजितेका दलले पनि समानुपातिकतर्फ थ्रेसहोल्ड पार गरे मतको संख्याअनुसार सांसद राख्न पाउँछन्। तर यस्तो कुनै पनि दल देखिएन।

अहिलेसम्म कुन दलले कति समानुपातिक मत ल्याए? हेर्नुहोस् ताजा सूची :

नेकपा एमाले
२७,८८,३५६

नेपाली कांग्रेस
२६,६०,२४६

एकल चिह्न गोलाकारभित्र हँसिया–हथौडा (नेकपा माओवादी केन्द्र/नेपाल समाजवादी पार्टी)
११,६२,१२४

राष्ट्रिय स्वतन्त्र पार्टी
११,२४,५४३

राष्ट्रिय प्रजातन्त्र पार्टी
५,८६,६३८

जनता समाजवादी पार्टी, नेपाल
४,२०,९४६

जनमत पार्टी
३,९४,५२३

नेकपा एकीकृत समाजवादी
२,९४,३६२

नागरिक उन्मुक्ति पार्टी
२,७१,६६२

लोकतान्त्रिक समाजवादी पार्टी नेपाल
१,६७,२८१

नेपाल मजदुर किसान पार्टी
७५,०५७