युनिकोड
प्रदेश २ को राजधानी जनकपुरधाम तोक्ने सर्वदलीय सहमतिसहितको संयुक्त प्रस्ताव समेत खारेज भएको छ।
सो प्रस्तावको पक्षमा ५२ मत मात्र प्राप्त भएपछि अस्वीकृत भएको हो। प्रस्तावको विपक्षमा पनि ५२ मत परेको छ। ३ मत बदर भएको छ।
आजै यसअघि प्रदेशको स्थायी नामाकरण गर्न भएको मतदानमा मधेश नाममा दुईतिहाई नपुगेपछि पर्सा, बारा, रौतहट र सप्तरीका समाजवादी र राजपाका सांसदहरू रुष्ट भएका थिए।
तीमध्ये अधिकांशले जनकपुरधाम राजधानी तोक्ने प्रस्तावको विपक्षमा मतदान गरेको बताइएको छ।
स्थायी नाम र राजधानी तोक्न कुनै प्रस्तावको पक्षमा प्रदेश सभाकाे दुईतिहाई बहुमत प्राप्त हुनुपर्छ। सो मत नपुगेसम्म क्रमशः अन्य प्रस्तावित नाममा मतदान हुनेछ। अब नाम र राजधानी तोक्ने दुवै प्रयोजनका लागि नयाँ प्रक्रिया सुरु हुने भएको छ।
प्रदेश २ सभामा जम्मा १ सय ७ प्रदेश सांसद छन। प्रदेश सभामा नेकपा ३२, सत्तारुढ समाजवादी पार्टी ३०, सत्ता साझेदार राजपा २५, प्रतिपक्षी कांग्रेसको १९ र १ जना स्वतन्त्र सांसद छन।
संयुक्त प्रस्ताव फेल भएपछि नेकपा र नेपाली कांग्रेसका नेताहरुले समाजवादी र राजपाका सांसदहरुलाई बेइमानी गरेको आरोप लगाएका छन्।
नेकपाका सांसद सत्रुधन महतोले ‘समाजवादी र राजपाले बेइमानी गरेको’ आरोप लगाए।
नेपाली कांग्रेस प्रदेश सभा संसदीय दलका नेता रामसरोज यादवले प्रदेश सरकारको सत्तारुढ दुबै दल (समाजवादी र राजपा) ले बेइमानी गरेको आरोप लगाए।
प्रदेश सरकारका भूमि व्यवस्था तथा कृषि सहकारी राज्यमन्त्री योगेन्द्र राय यादवले भने दुवै प्रतिपक्षि दल (नेकपा र कांग्रेस) ले सहमति अनुसार मतदान नगरेको आरोप लगाए।
साेहि प्रदेश नामाकरणका लागि मंगलबार नै भएकाे मतदानमा सबै चारमध्ये कुनैपनि प्रस्तावमा दुईतिहाई मत नपुगेपछि सबै प्रस्ताव अस्वीकृत भएका थिए। याेसँगै अब स्थायी नामाकरण र राजधानी दुवैका लागि नयाँ प्रक्रिया सुरू हुने भएकाे छ।
याे पनि:
प्रदेश २ नामाकरणको चारै प्रस्ताव फेल, अब नयाँ प्रक्रिया सुरु हुने
प्रदेश २ नामाकरणः मध्य-मधेश नामको पक्षमा ४२ मत, तेस्रो प्रस्ताव पनि खारेज
प्रतिक्रिया