युनिकोड
प्रधानमन्त्री एवं नेकपा एमालेका अध्यक्ष केपी शर्मा ओलीले जेठ १५ गते काठमाडौँ एमालेको नियन्त्रणमा राख्न निर्देशन दिएका छन्।
नेकपा एमालेको बागमती प्रदेशस्तरीय जननिर्वाचित वडाध्यक्षहरुको प्रशिक्षण कार्यक्रमको आइतबार उद्घाटन गर्दै उनले राजावादीहरुको आन्दोलन रोक्न जेजस्तो गर्नुपर्छ त्यस्तै तयारीमा लाग्न समेत निर्देशन दिए।
ओलीले थपे, ‘आन्दोलनमा प्रोटोकल, स्रोटोकलको कुरा हुँदैन।’
राजावादीहरूले राजसंस्था पुर्नस्थापना गर्ने भन्दै जेठ १५ गतेदेखि आन्दोलनको घोषणा गरेका छन्।
एमालेका सबै कार्यकर्ता परिचालित हुँदा कसैले रोक्न नसक्ने समेत ओलीको भनाइ छ। ‘म साथीहरुलाई भन्न चाहान्छु, निर्देशन पछि आउला,’ उनले भने, ‘यहाँबाट उठ्ने बित्तिकै १५ गतेको तयारी थाल्नुहोस्। १५ गते के के गर्नुपर्छ भन्ने कुरा पार्टीले भन्छ। यति परिचालन भएर जनता ल्याउँदा कसले थाम्छ? कसले रोक्छ?'
राजावादीहरुको कडा आलोचना गर्दै उनले भने, ‘यिनीहरु हिजो बेलुका पनि नारायणहिटी अगाडि हाम्रो राजा, हाम्रो देश प्राणभन्दा प्यारो छ भन्ने नारा लगाउँदै रहेछन्। प्राणभन्दा प्यारो छ भने वीरेन्द्रलाई मार्दा यिनीहरु कहाँ गएका थिए?’
सधै झुटा कुरा बोल्ने र चाप्लुसी गर्ने राजावादीहरुको बानी रहेको समेत ओलीले आरोप लगाए।
‘सधै झुटा, चाप्लुसी गर्ने त्यो मण्डलेहरुको बानी हो,’ उनले भने, ‘यिनीहरु कुनै महान उदेश्यका लागि लडेका छैनन्। सरकार अलि मौन बसेको र जनता अलि मौन बसेको अवस्था। त्यो अवस्थाको फाइदा लिएर उनीहरुले अनावश्यक पुर्तिफार्ती देखाएका छन्।’
प्रतिक्रिया