मुस्किल पर्‍यो एकीकृत समाजवादीलाई थ्रेसहोल्ड कटाउन

प्रतिनिधिसभा सदस्य निर्वाचन प्रत्यक्षतर्फ १० सिट जिते पनि सत्तारुढ नेकपा एकीकृत समाजवादीलाई समानुपातिकतर्फ भने थ्रेसहोल्ड कटाउन मुस्किल परिरहेको छ।

बाजुरा र दोलखाको मात्र समानुपातिक मत गन्न बाँकी हुँदा पनि एकीकृत समाजवादीले प्राप्त मतको संख्या ३ लाख पनि पुर्‍याउन सकेको छैन। थ्रेसहोल्ड कटाउन ३ लाख १७ देखि १८ हजारसम्म मत ल्याउनुपर्ने अहिलेसम्मको गणनाले देखाएको निर्वाचन आयोगका सूचना अधिकारी एवं सहायक प्रवक्ता सूर्यप्रसाद अर्यालले बताए।

यो खबर तयार पार्दासम्म एकीकृत समाजवादीले समानुपातिकतर्फ २ लाख ९४ हजार ३ सय ६२ मत मात्र प्राप्त गरेको छ। थ्रेसहोल्ड पार गर्न उसलाई अझै २३ देखि २४ हजार मत आउनुपर्ने देखिन्छ।

आयोगका सहायक प्रवक्ता अर्यालका अनुसार समानुपातिकतर्फ अब दोलखाको ८० हजारभन्दा केही बढी र बाजुराको ६५ देखि ७० हजारसम्म मत गणना गर्न बाँकी होला। अर्थात् डेढ लाख आसपास मत गन्न बाँकी देखिन्छ।

तर यो मत सबै दललाई बाँडिएर जाने भएकाले यसबाट एकीकृत समाजवादीले मात्रै २३–२४ हजार मत पाउन मुस्किल देखिन्छ।
आयोगका सहायक प्रवक्ता अर्यालले पनि मत गणनाको अवस्था अहिलेकै अनुपातमा कायम रहे थप दलले थ्रेसहोल्ड कटाउने सम्भावना एकदम कम रहेको बताए।

अहिलेसम्म सात दल नेकपा एमाले, नेपाली कांग्रेस, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी र जनमत पार्टीले मात्र थ्रेसहोल्ड पार गरेका छन्। प्रत्यक्षतर्फ पनि सिट जितेका यी पार्टी राष्ट्रिय दल बनेका छन्। राष्ट्रिय दलको मान्यता पाउन प्रतिनिधिसभा प्रत्यक्षतर्फ कम्तीमा एक सिट जितेर समानुपातिकमा थ्रेसहोल्ड अर्थात् कूल सदर मतको ३ प्रतिशत मत कटाउनुपर्छ।

तर प्रत्यक्षतर्फ आफूभन्दा कम ७ सिट मात्र जितेका जनता समाजवादी पार्टी, राष्ट्रिय स्वतन्त्र पार्टी र राष्ट्रिय प्रजातन्त्र पार्टी मात्र होइन, एक सिटमा मात्र विजयी भएको जनमत पार्टीले राष्ट्रिय दल बन्दा एकीकृत समाजवादी भने यसबाट वञ्चित हुने जोखिम बढेको छ।

अहिलेसम्म कुन दलले कति समानुपातिक मत ल्याए? हेर्नुहोस् ताजा सूची :

नेकपा एमाले
२७,८८,३५६

नेपाली कांग्रेस
२६,६०,२४६

एकल चिह्न गोलाकारभित्र हँसिया–हथौडा (नेकपा माओवादी केन्द्र/नेपाल समाजवादी पार्टी)
११,६२,१२४

राष्ट्रिय स्वतन्त्र पार्टी
११,२४,५४३

राष्ट्रिय प्रजातन्त्र पार्टी
५,८६,६३८

जनता समाजवादी पार्टी, नेपाल
४,२०,९४६

जनमत पार्टी
३,९४,५२३

नेकपा एकीकृत समाजवादी
२,९४,३६२

नागरिक उन्मुक्ति पार्टी
२,७१,६६२

लोकतान्त्रिक समाजवादी पार्टी नेपाल
१,६७,२८१

नेपाल मजदुर किसान पार्टी
७५,०५७