समानुपातिकको अन्तिम मत परिणाम कहिले आउँछ? अहिलेसम्मको अवस्था के छ? (सूची)

प्रतिनिधिसभा सदस्य निर्वाचनअन्तर्गत समानुपातिकतर्फ अन्तिम मतपरिणाम आउने बेला भएको छ। निर्वाचन आयोगका सूचना अधिकारी एवं सहायक प्रवक्ता सूर्यप्रसाद अर्यालका अनुसार अब बाजुरा र दोलखामा खसेको समानुपातिक मत मात्र आयोगको सूचना प्रणालीमा प्रविष्ट गर्न बाँकी छ।

यसबाहेक देशभरबाट समानुपातिक मतको विवरण प्राप्त भइसकेको उनले जानकारी दिए। ‘बाजुरा र दोलखामा पनि मत गणना भइसकेको हुनुपर्छ’, सहायक प्रवक्ता अर्यालले सोमबार बिहान नेपालखबरको जिज्ञासामा भने, ‘तर त्यहाँबाट तथ्यांक हामीलाई पठाएका छैनन्, आज ताकेता गर्नुपर्छ।’ उनले अब २ दिनभित्रमा समानुपातिकको अन्तिम मत परिणाम आउने अनुमान गरे।

उनका अनुसार ती दुई जिल्लाको गरेर अब डेढ लाखजति मत आयोगको सूचना प्रणालीमा जोड्न बाँकी छ। समानुपातिकतर्फ अहिलेसम्म १ करोड ४ लाख २० हजार १ सय २५ मत सदर भएका छन्।

आयोगका सहायक प्रवक्ता अर्यालका अनुसार समानुपातिकतर्फ ४ प्रतिशतजति मत बदर भएका छन्। कूल सदर मतको ३ प्रतिशत थ्रेसहोल्ड पार गर्ने दलले मात्र सांसद निर्वाचित गर्न पाउँछन्। प्रतिनिधिसभा प्रत्यक्षतर्फ कम्तीमा एक सिट जितेको दलले थ्रेसहोल्ड कटाएमा राष्ट्रिय दलको मान्यता पाउँछन्। अहिलेसम्म यो मान्यता सात दलले पाएका छन्। ती हुन्– नेकपा एमाले, नेपाली कांग्रेस, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनतमा समाजवादी पार्टी र जनमत पार्टी।

राष्ट्रिय दलको मान्यता पाउँदा र नपाउँदा के फरक पर्छ?

प्रत्यक्षतर्फ एक सिट मात्र जितेको जनमत पार्टीले पनि समानुपातिकतर्फ थ्रेसहोल्ड कटाउँदा १० सिट जितेको नेकपा एकीकृत समाजवादीले भने अझै थ्रेसहोल्ड छुन सकेको छैन। बाजुरा र दोलखाको गरेर करिब डेढ लाख मतको हिसाब मिलान गर्न बाँकी रहँदा एकीकृत समाजवादीले २ लाख ९४ हजार ३ सय ६२ मत (समानुपातिक) मात्र प्राप्त गरेको छ। आयोगका सहायक प्रवक्ता अर्यालका अनुसार कूल सदर मतको ३ प्रतिशत थ्रेसहोल्ड पार गर्न अहिलेसम्मको हिसाबले ३ लाख १७ देखि १८ हजारसम्म मत कटाउनुपर्ने देखाएको छ।

जसअनुरूप एकीकृत समाजवादीले थ्रेसहोल्ड पार गर्न अझै २४/२५ हजार मत पाउनुपर्ने देखिन्छ। समेट्न बाँकी मतबाट उसले यति ल्याउला भनेर भन्न कठिन छ। तर पनि अन्तिम नतिजा नआउँदासम्म यसै भन्न सकिन्न।

मुस्किल पर्‍यो एकीकृत समाजवादीलाई थ्रेसहोल्ड कटाउन

समानुपातिक निर्वाचनतर्फ सहभागी दलमध्ये सबैभन्दा धेरै मत ल्याएर नेकपा एमाले पहिलो बनेको छ। उसले यो खबर तयार पार्दासम्म २७ लाख ८८ हजार ३ सय ५६ मत पाएको छ। दोस्रो स्थानमा रहेर नेपाली कांग्रेसले अहिलेसम्म २६ लाख ६० हजार २ हजार ४६ समानुपातिक मत ल्याएको छ।

बाँकी विवरण सूचीमै हेर्नुहोस्

नेकपा एमाले
२७,८८,३५६

नेपाली कांग्रेस
२६,६०,२४६

एकल चिह्न गोलाकारभित्र हँसिया–हथौडा (नेकपा माओवादी केन्द्र/नेपाल समाजवादी पार्टी)
११,६२,१२४

राष्ट्रिय स्वतन्त्र पार्टी
११,२४,५४३

राष्ट्रिय प्रजातन्त्र पार्टी
५,८६,६३८

जनता समाजवादी पार्टी, नेपाल
४,२०,९४६

जनमत पार्टी
३,९४,५२३

नेकपा एकीकृत समाजवादी
२,९४,३६२

नागरिक उन्मुक्ति पार्टी
२,७१,६६२

लोकतान्त्रिक समाजवादी पार्टी नेपाल
१,६७,२८१

नेपाल मजदुर किसान पार्टी
७५,०५७