युनिकोड
पोखरा महानगरपालिकाका मेयर धनराज आचार्यले पोखरामा हालै देखिएको फोहोरको समस्या समाधानको बाटोमा गएको बताएका छन्।
अन्तर्राष्ट्रिय विमानस्थल सञ्चालन र हालैका आन्दोलनका कारण सिर्जित फोहोरले व्यवस्थापनमा केही असहजता ल्याए पनि महानगरले अल्पकालीन र दीर्घकालीन समाधानका काम सँगसँगै अघि बढाएको आचार्यको भनाइ छ। लामो समयसम्म फोहोर नउठेर आलोचना खेप्नुपरेको भन्दै मेयर आचार्यले चुनावको मुखैमा फोहोर उठ्न नसक्नुको मुख्य कारण साउन-भदौसम्म पुग्ने अनुमान गरिएको अस्थायी विसर्जन केन्द्र जेनजी आन्दोलनका कारण छिट्टै भरिएको बताए।
मेयर आचार्यले चुनावको समयमा नयाँ ठाउँ खोज्न र व्यवस्थापन गर्न कठिन भए पनि गत फागुन ३० गतेबाट नयाँ अस्थायी विसर्जन केन्द्र तयार गरी फोहोर उठाउन थालिएको र अब पोखरा पुरानै अवस्थामा सफा हुने उनले जानकारी दिए। ‘आन्दोलनमा ११८ वटा सरकारी भवनहरू डढे, भाटभटेनीलगायत निजी क्षेत्रका सयौँ ट्रक डढेका र अधकल्चा सामानहरू फोहोरको रूपमा आए, जसले गर्दा फोहोर फाल्ने ठाउँ अनुमानभन्दा धेरै छिटो भरियो,’ उनले भने।
दीर्घकालीन समाधानका लागि महानगरले ‘फोहोरबाट मोहोर’को अवधारणाअन्तर्गत काम सुरु गरिसकेको छ। पोखरामा दैनिक करिब २२५ टन फोहोर उत्पादन हुने गरेको तथ्यांक प्रस्तुत गर्दै मेयर आचार्यले यसबाट साढे ७ मेगावाट बिजुली बराबरको ऊर्जा उत्पादन गर्न सकिने बताए।
यसका लागि युरोपियन प्रविधि प्रयोग गरी एलपी ग्यास, कम्पोस्ट मल र निर्माणका ब्लकहरू उत्पादन गर्न अस्ट्रेलियामा रहेका गैरआवासीय नेपाली (एनआरएन) हरूको टोलीलाई गत मंसिर ९ गते ठेक्का दिइसकिएको छ। ‘अबको ६ देखि ८ महिनाभित्रै मेसिनरी जडान गरी एक वर्षभित्रमा नेपालकै नमुना फोहोर प्रशोधन केन्द्र सञ्चालनमा आउनेछ। यो टिकट काटेर हेर्नलायक बन्नेछ,’ उनले भने।
यसअघि एशियाली विकास बैंक (एडीबी) को सहयोगमा १९ वर्षअघि निर्माण गरिएको अत्याधुनिक सेनेटरी ल्यान्डफिल साइट अन्तर्राष्ट्रिय विमानस्थल सञ्चालनमा आएपछि चराहरूको जोखिम कम गर्न बन्द गर्नुपरेको थियो। सन् २०२३ जनवरी १ बाट विमानस्थल सुरु भएपछि पोखरा–३२ को लामेआहालमा अस्थायी व्यवस्थापन गरिँदै आइएको थियो।
मेयर आचार्यले फोहोरमैलामा राजनीति नगर्न र अनावश्यक टीकाटिप्पणी नगर्न सबैलाई आग्रह गरेका छन्। ‘आफ्नो घर अगाडिको फोहोर उठ्नुपर्छ भन्ने तर आफ्नो वडामा फाल्न नदिने प्रवृत्ति जतासुकै छ। सहर सफा राख्ने दायित्व हामी सबैको हो,’ उनले भने।
हाल फोहोर विसर्जन भइरहेको नयाँ स्थानमा मानव स्वास्थ्य र पर्यावरणमा कुनै असर नपर्ने गरी प्राविधिक व्यवस्थापन गरिएको प्रतिवद्धतासमेत उनले जनाएका छन्। पोखरा देशकै सबैभन्दा सफा शहर भएको र यसलाई कायम राख्न महानगरका सयौँ कर्मचारी दैनिक खटिरहेको स्मरण गराउँदै उनले पोखरेलीको आफैँ सडक सफा गर्ने पुरानो संस्कृतिको समेत प्रशंसा गरेका छन्।
प्रतिक्रिया