सुदन किरातीले छाडे प्रगतिशिल लोकतान्त्रिक पार्टी, रास्वपा र श्रम संस्कृतिसँग संवादमा

प्रगतिशिल लोकतान्त्रिक पार्टी (प्रलोपा) का अध्यक्ष परिषद्का सदस्य सुदन किरातीले राजिनामा दिएका छन्। अध्यक्ष परिषद्मा रहेका किरातीसँगै दुर्गा सोब र ओजस्वी भट्टराईले पनि राजिनामा दिएको सार्वजनिक भएको छ। यद्यपी उनीहरू दुई जनाले यसबारे औपचारिक रूपमा बोलेका छैनन्। 

किरातीले भने राजिनामा दिएको पुष्टि भएको छ। ‘सुदन किराती तात्तकालिन नेकपा (माओवादी केन्द्र)मा रहँदा पनि पार्टीलाई नयाँ ढंगले अघि बढाउनुपर्छ भनेर बाहिरिनुभएको हो,’ प्रलोपाका विशेष कोसी प्रदेस प्रमुख सन्जय राईले सुदनको राजिनामा पुष्टि गर्दै भने, ‘त्यहीँ आधारमा प्रलोपा गठन भयो। तर यहाँ पनि त्यो सम्भावना देखिएन। त्यसैले नैतिकता र विचारधारात्मक निष्ठाको आधारमा चुनावी परिणाम लगत्तै राजिनामा दिनुभएको हो।’  

तात्तकालीन नेकपा (माओवादी केन्द्र)का उपमहासचिव जनार्दन शर्मा र पूर्व माओवादी नेता डा. बाबुराम भट्टराईको अगुवाइमा बनेको प्रलोपाको अध्यक्ष मण्डलमा पाँच जना सदस्य थिए। तीन जनाले राजिनामा दिएपछि अब अशोक जैसवाल र सन्तोष परियार अध्यक्ष मण्डलमा रहेका छन्। गत ८ मंसिरमा गठन भएको पार्टीको अध्यक्ष परिषद्का सदस्य सन्तोष परियारले भने किराँतीको राजीनामाबारे स्पष्ट जानकारी नभएको बताएका छन्। उनले पार्टी सञ्चालनको विषयमा केही असन्तुष्टि देखिएको भने स्वीकारेका छन्। 

त्यसबारे छलफल गर्न बुधबार परिषद् बैठक बसेको थियो। किराती उक्त बैठकमा सहभागी भएनन्। किरातीले पार्टीभित्र नेतृत्व शैली र निर्णय प्रक्रियामा पुरानै पार्टीको शैली हावी भएको भन्दै असन्तुष्टि जनाउँदै आएको उनी निकट अर्का एक नेताले जानकारी दिए।