पत्रकार निरा श्रेष्ठको निधनप्रति महासंघ दुःखी

नेपाल पत्रकार महासंघ थाहा सञ्चार प्रतिष्ठान शाखाका राष्ट्रिय परिषद् सदस्य निरा श्रेष्ठ ‘निरु’ को उपचारको क्रममा महाराजगञ्जस्थित त्रिवि शिक्षण अस्पतालमा निधन भएको छ।

४० वर्षीया निरुको निधनप्रति नेपाल पत्रकार महासंघले दुःख व्यक्त गरेको छ।

महासंघका अनुसार केही समयदेखि जिब्रोको क्यान्सरबाट पीडित श्रेष्ठको एक सातादेखि उक्त अस्पतालमा उपचारत भई रहेकोमा उपचारकै क्रममा वैशाख ६ गते बिहीबार निधन भएको हो। श्रेष्ठका श्रीमान र एक छोरी छन्।

झण्डै दुई दशकदेखि पत्रकारितामा सक्रिय श्रेष्ठ विसं २०६४ सालमा हेटौंडामा स्थापित रेडियो थाहा सञ्चार ९९.६ मेगाहर्जमा सुरुदेखि नै आवद्ध रहेर काम गरेकी थिइन्।

विसं २०७२ सालदेखि काठमाडौंको रेडियो थाहा सञ्चार नेटवर्क ९९.४ मेगाहर्जमा आवद्ध रही पछिल्लो डेढ दशकदेखि युवालक्षित कार्यक्रम निर्माण र सञ्चालकका रूपमा कार्यरत थिइन्। त्यस दौरान श्रेष्ठले चितवन र वीरगञ्जको विभिन्न रेडियोमा समेत काम गरेकी थिइन्।