नेपाल प्रवेश गर्दै पश्चिमी न्यून चापीय प्रणाली, शुक्रबारदेखि पर्नेछ हिउँ र पानी

शुक्रबार वर्षा र हिमपात गराउने पश्चिमी न्यून चापीय प्रणाली प्रवेश गर्ने भएकाले शनिबारसम्म देशका धेरै स्थानमा वर्षा र हिमपात हुने सम्भावना रहेको जल तथा मौसम विज्ञान विभाग, मौसम पूर्वानुमान महाशाखाले जानकारी गराएको छ। 

महाशाखाले बिहीबार हिउँदे मौसमको विशेष बुलेटिन-२ जारी गरी पश्चिमी न्यून चापीय प्रणालीका कारण शुक्रबार साँझदेखि देशका धेरै स्थानमा मौसम बदली भई वर्षा र हिमपात सुरु हुने जानकारी दिएको हो। 

बुलेटिनमा भनिएको छ: सो प्रणालीको प्रभावका कारण मिति २०८१ पुस १२ गते (शुक्रबार) अपराह्नदेखि मिति २०८१ पुस १३ गते (शनिबार) सम्म सुदूरपश्चिम प्रदेश र कर्णाली प्रदेशका उच्च पहाडी तथा हिमाली भूभागका अधिकांश स्थानमा तथा गण्डकी प्रदेश, बागमती प्रदेश र कोशी प्रदेशका उच्च पहाडी तथा हिमाली भूभागका केही स्थानमा हल्कादेखि मध्यम हिमपात हुने सम्भावना छ। साथै सुदूरपश्चिम प्रदेश र कर्णाली प्रदेशका धेरै स्थान र लुम्बिनी प्रदेशका केही स्थानमा हल्कादेखि मध्यम वर्षा तथा गण्डकी प्रदेश, बागमती प्रदेश, मधेस प्रदेश र कोसी प्रदेशका थोरै स्थानमा हल्का वर्षाको सम्भावना छ। साथै उक्त मौसम प्रणालीको असरले तापक्रमसमेत घट्न गई चिसो बढ्न सक्ने सम्भावना छ।

सचेत गराउँदै बुलेटिनमा अगाडि भनिएको छ: तसर्थ वर्षा, हिमपात तथा चिसोका कारण दैनिक जनजीवन, स्वास्थ्य, पर्वतारोहण, हवाई/यातायातलगायत दैनिक जनजीवनमा समेत असर पर्नसक्ने देखिएकाले आवश्यक सतर्कता तथा पूर्वतयारी अपनाउन हुन सर्वसाधारण तथा सबै सरोकारवाला निकायहरूमा अनुरोध छ।

हेर्नुहोस् विशेष बुलेटिन-