पुनर्निर्मित असन सत्तलको भिडिओ सेयर गर्दै बालेनले भने : ‘सामाजिक चेतनाको विम्व’

काठमाडौँ महानगरपालिकाका मेयर बालेन्द्र शाहले पुनर्निर्माण भइरहेको असन सत्तल नेपाली सामाजिक चेतनाको विम्व भएको बताएका छन्।

केही वर्षअघि कोरोनाकालमा क्वारेन्टाइनमा बस्ने प्रचलन रहेको स्मरण गर्दै मेयर शाहले नेपालमा ३/४ सय वर्षअघि नै त्यसखालको चेतना आइसकेको उल्लेख गरेका छन्।

शुक्रबार असनस्थित सत्तलको पुनर्निर्मित भिडिओ सामाजिक सञ्जालमा सार्वजनिक गर्दै उनले भोटमा व्यापार गरेर फर्किएकाहरूका लागि सत्तलमा बस्ने र भोटाहिटीमा नुहाएर मात्रै घर जाने प्रचलन रहेको बताएका छन्।

कलात्मक शैलीको उक्त सत्तल आउँदो जेठ १५ गतेभित्र निर्माण सम्पन्न गर्ने लक्ष्य राखिएको छ। सत्तलको पुनर्निर्माण लागत २ करोड ४९ लाख ३७ हजार ५७२ रुपैयाँ रहेको मेयर शाहले जानकारी दिएका छन्।