तनहुँमा अनियन्त्रित मोटरसाइकल सडकको रेलिङमा ठोकिँदा १९ र २३ वर्षीय युवक घाइते

तनहुँमा तीव्र गतिको मोटरसाइकल आफैँ अनियन्त्रित भएर दुर्घटना हुँदा दुई युवक घाइते भएका छन्। 

आज बिहान सवा आठ बजेतिर म्याग्दे गाउँपालिका-१ तल्लो गुणादीस्थित पृथ्वी राजमार्गमापोखराबाट दमौलीतर्फ जाँदै गरेको बा.प्र-०-(०५१ प ९३४७ नम्बरको मोटरसाइकल दुर्घटनामा परेको हो। 

दुर्घटनामा मोटरसाइकल चालक धादिङको गल्छी गाउँपालिका-४ घर भएका १९ वर्षीय निश्चल अधिकारी र मोटरसाइकलको पछाडि सवार नुवाकोटको विदुर नगरपालिका निवासी २३ वर्षीय प्रदीप नेपाल घाइते भएका जिल्ला प्रहरी कार्यालय तनहुँले जनाएको छ। 

दुवै घाइतेको हाल दमौली अस्पतालमा उपचार भइरहेको र उनीहरूको अवस्था खतरामुक्त रहेको प्रहरीले जनाएको छ। 

तीव्र गतिको मोटरसाइकल सडक छेउको रेलिङमा ठक्कर खाएर दुर्घटना भएको प्रहरीको भनाई छ।