तनहुँमा स्कुटर दुर्घटना हुँदा महिलाको मृत्यु, चितवनमा मोटरसाइकल नहरमा खस्दा पुरुषको निधन

पृथ्वीराजमार्गअन्तर्गत तनहुँको म्याग्दे गाउँपालिका-१ गुणादीमा आज (बिहीबार) बिहान स्कुटर दुर्घटना हुँदा युवतीको मृत्यु भएको छ।

जिल्ला प्रहरी कार्यालयका प्रहरी नायब उपरीक्षक श्रवणकुमार विकका अनुसार दुर्घटनामा भरतपुर महानगरपालिका-१६ की २७ वर्षीया सुमित्रा थापाको मृत्यु भएको हो।

दुर्घटनामा स्कुटर चालक म्याग्दे गाउँपालिका-३ का २७ वर्षीय पुरन मगर घाइते भएका छन्। निजको दमौलीस्थित प्रदेश अस्पतालमा उपचार भइरहेको छ। उनीहरू पोखराबाट दमौली आइरहेका थिए।

यसैबिच चितवनको भरतपुर महानगरपालिका-१४ राधापुर नहरमा गएराति मोटरसाइकल खस्दा युवकको मृत्यु भएको छ।

जिल्ला प्रहरी कार्यालयका प्रहरी नायब उपरीक्षक रवीन्द्र खनालका अनुसार भरतपुर महानगरपालिका-१६ का ४० वर्षीय विनोद सुवेदी रहेको मृत्यु भएको हो।

गम्भीर घाइते भएका सुवेदीको भरतपुर अस्पतालमा उपचारका क्रममा मृत्यु भएको हो। शव परीक्षणका लागि सोही अस्पतालमा राखिएको छ।