युनिकोड
आज (बिहीबार) बिहानैदेखि काठमाडौं उपत्यकासहित देशभर मौसम बदली भएको मौसम पूर्वानुमान महाशाखाले जनाएको छ।
महाशाखाका अनुसार अहिले (बिहीबार बिहान) मध्य क्षेत्रमा मौसम सामान्य बदली छ भने देशका बाँकी स्थानमा आंशिक बदली छ।
विशेषगरी अपराह्नपछि काठमाडौं उपत्यकासहित मध्य र पूर्वी पहाडका थोरै स्थानमा तथा पश्चिमका केही स्थानमा हावाहुरी र चट्याङसहित वर्षा हुने सम्भावना देखिएको महाशाखाकी मौसमविद् सजिना शाक्यले जानकारी दिइन्।
‘छिटफुट वर्षाको सम्भावना त अहिल्यैदेखि देखिएको छ,’ बिहीबार नेपालखबरसँग उनले भनिन्, ‘तर पनि विशेषगरी अपराह्नपछि नै वर्षाको सम्भावना छ।’
यस्तै राति पनि मध्य र पूर्वी भू-भागका केही स्थान साथै पश्चिमी भू-भागका थोरै स्थानमा मेघगर्जन/चट्याङ/हावाहुरीसहित वर्षाको सम्भावना महाशाखाले जनाएकाे छ।
मौसमविद्का अनुसार हाल नेपालमा पश्चिमी वायुको आंशिक प्रभाव भने पूर्वी भूभागनजिकै निम्न चापीय रेखा छ। साथै स्थानीय वायुको पनि प्रभाव छ।
प्रतिक्रिया