मुगु पनि काेरोनाबाट अछुतो रहेन

देशभरका ७७ जिल्लामध्ये ६१ जिल्लामा काेरोना संक्रमण देखिरहँदा पनि कोरोनाले नछोएको मुगु जिल्लाका एक जनामा कारोना संक्रमण पुष्टि भएको छ।

जिल्लाको खत्याड गाउँपालिका–२ घर भएका २७ वर्षीय युवकको आज बिहान कर्णाली स्वास्थ्य विज्ञान प्रतिष्ठान जुम्लाको ल्याबमा स्वाब पीसीआर परीक्षण गर्दा पोजिटिभ रिपोर्ट आएको जिल्ला स्वास्थ्य सेवा कार्यालय मुगुका प्रमुख निर्मल नगरकोटीले जानकारी गराए।

सङ्क्रमित युवा खत्याड गाँउपालिकाले स्थापना गरेको हलेखाड क्वारेन्टिनमा बस्दै आएका थिए। कोरोना संक्रमित युवालाई बिहीबारै रातापानी प्राथमिक स्वास्थ्य केन्द्रमा रहेको आइसोलेशनमा वार्डमा राखिएको छ भने निजको स्वास्थ्य अवस्था सामान्य रहेको बताइएको छ।

जिल्लाका रहेका चार स्थानीय तहमध्ये सबैभन्दा बढी भारतबाट सोही गाउँपालिकाका स्थानीयवासी भित्रिएपछि सरोकारवालाले यो गाउँपालिका कोरोना भाइरस संक्रमणको उच्च जोखिममा रहेको बताउँदै आएका थिए। संक्रमित रहेको क्वारेन्टिनमा रहेका अन्य ४७ जनाको एक हप्तापछि आरडिटी गरेर मात्र घर पठाउने डा नगरकोटीले बताए।

मुगुमा थपिएको एकसहित कर्णाली प्रदेशमा कोरोना भाइरसबाट संक्रमितको संख्या २७९ पुगेको छ।रासस