युनिकोड
गुल्मीको इस्मामा गएको पहिरोमा परी घाइते भएकाहरुलाई उपचारका लागि काठमाडाैं ल्याइएकाे छ। इस्मा गाउँपालिका-१ हस्तिचौरका ६ जना घाइतेलाई नेपाली सेनाको हेलीकोप्टरमार्फत शुक्रबार काठमाडौं ल्याइएको हो।
घाइते मध्ये २७ वर्षीया इश्वरी खत्रीको उपचार शिक्षण अस्पताल महाराजगन्ज र अन्य ५ जनाको सैनिक अस्पताल छाउनीमा भइरहेको छ। ६४ वर्षीया टीका खत्री, २५ वर्षिय वसन्त खत्री, २१ वर्षीया सृजना सारु र ९० वर्षीया पुतली खत्रीको सैनिक अस्पताल छाउनीमा उपचारको व्यवस्था गरिएको हाे।
पहिरोमा परी स्थानीय वसन्त सारुका १८ महिने छोरा सुरज सारु र ईश्वरी खत्री की ७ वर्षकी छोरी अपेक्षा खत्रीको मृत्यु भएको छ।
पहिरोका कारण उक्त क्षेत्रमा बसोबास गर्ने करिव १६० घर परिवार प्रभावित भएका छन्।
घाइतेको उद्धारका लागि पूर्वमन्त्री तथा गुल्मी क्षेत्र नम्बर २ का सांसद गोकर्ण बिष्ट सेनाको हेलिकोप्टरमा दिउँसो घटनास्थल पुगेका थिए। पूर्वमन्त्री बिष्टले पहिरोमा परेर प्रभावित भएका परिवारलाई टेण्ट र खाद्यान्न समेत पुर्याएका छन्।
मुसिकोट नगरपालिका–२ को हाँडीखोलामा हरिप्रसाद घिमिरेको घुम्ती पसल पहिरोले बगाउँदा अन्दाजी ५५ वर्षीय भागीरथ घिमिरे बेपत्ता भएका छन्। उनको खोजी कार्य जारी छ।
प्रतिक्रिया