युनिकोड
महोत्तरी र रौतहटमा खोलाको बाढीले बगाउँदा दुई जनाको मृत्यु भएको छ।
मंगलबार बिहान रातु नदीले बगाउँदा महोत्तरीको भंगहा नगरपालिका ६ बस्ने वर्ष ४० का विरेन्द्र कापडको मृत्यु भएको छ। जनकपुरबाट घर संग्रामपुर जाने क्रममा साइकल लिएर खोला तर्न खोज्दा बिहान १० बजे उनलाई बाढीले बगाएको थियो।
बाढीमा बेपत्ता भएका कापडको शव अपराहन्न ५ बजे महोत्तरीको बल्बा नगरपालिका ४ भगवतीपुर नजिक खोला किनारमा मृत अवस्थामा भेटिएको महोत्तरीका प्रहरी प्रहरी नायव उपरीक्षक प्रकाश विष्टले जानकारी दिए। उनका अनुसार खोजतलासको क्रममा बगाएको ठाउँबाट झण्डै १४।१५ किलोमिटर दक्षिणमा कापडको शव भेटिएको हो।
अहिले शव फेला परेको ठाउँमा जिल्ला प्रहरीको टोली पुगेर मुचुल्का गरी शवलाई पोस्टमार्टमका लागि जिल्ला अस्पताल जलेश्वर लैजाने तयारी भइरहेको उनले बताए।
यस्तै रौतहटको खहरे खोलाले बगाउँदा चन्द्रपुर नगरपालिका-३ का ५८ वर्षीय सुकुमान थिङको मंगलबार मृत्यु भएको छ। स्थानीय गैडाटारमा अस्थायी प्रहरी पोष्ट नजिकै रहेको अंकडा बाँधको खहरे खोलामा आएको बाढीले थिङलाई मंगलबार बिहान ११ बजे बगाएको थियो। उनको खोजतलासको क्रममा ३ घण्टापछि शव फेला परेको इलाका प्रहरी कार्यालय चन्द्रपुरले जनाएको छ।
स्थानीयले चाँदी नदीको पानीलाई सिंचाईको लागि खहरे प्रयोग गर्ने गरेकोमा खोलामा पानीको बहाव खोल्न जाँदा बाढीको बेगले उनलाई बगाएको थियो।
प्रतिक्रिया