युनिकोड
सशस्त्र प्रहरी जवान मनोहर कुमार यादवको हत्यामा संलग्न तीन जनालाई प्रहरीले पक्राउ गरेको छ।
बोर्डर आउट पोष्ट माडर सिरहामा कार्यरत सशस्त्र प्रहरी जवान यादवको हत्या गरेर भागेका तीनजनालाई प्रहरीले पक्राउ गरेको हो।
पक्राउ पर्नेहरूमा सिरहा नगरपालिका–३ मखनाहाका २५ वर्षीय जयकेश कुमार यादव, मंगला भन्ने २० वर्षीय दिपेश कुमार यादव र बुलना भन्ने २२ वर्षीय मुकेश कुमार यादव रहेका छन्।
गत असार १६ गते सिरहा नगरपालिका–१४ खिरौनास्थित नहरको पानीमा महोत्तरी सोनमा गाउँपालिका–३ घर भई सिरहा नगरपालिका–१७ स्थित बीओपीमा कार्यरत सशस्त्र प्रहरी जवान यादव मृत फेला परेका थिए। घटना अनुसन्धानको क्रममा उनीहरूले सोही दिन दिउँसो सिरहा नगरपालिका–३ स्थित विवाहमा भएको सामान्य विवादमा यादवलाई चोर, चोर भनि करिब ३ किलोमिटर लखेटेर नहरमा डुबाई मारेको खुलेको प्रहरीले जनाएको छ।
२ नम्बर प्रदेश प्रहरी कार्यालय जनकपुर र जिल्ला प्रहरी कार्यालय सिरहाबाट खटिएको संयुक्त प्रहरी टोलीले उनीहरूलाई पक्राउ गरेको हो।
उनीहरूमाथी थप अनुसन्धन भइरहेको २ नम्बर प्रदेश प्रहरी कार्यालयले जनाएको छ।
प्रतिक्रिया