युनिकोड
स्वास्थ्य तथा जनसंख्या मन्त्रालयले गत चैतमा लकडाउन गरेयताका ६ महिनामा १ सय ३० वटा भेन्टिलेटर थपेको प्रगति सुनाएको छ।
मन्त्रालयका प्रवक्ता प्राडा जागेश्वर गौतमले सोमबारको नियमित पत्रकार सम्मेलनमा चैतयता देशभर उक्त संख्यामा भेन्टिलेटर थपिएको जानकारी दिएका हुन्।
‘चैतमा लकडाउन सुरु हुनुअघि हामीसँग ७ सय ७० भेन्टिलेटर थिए। अहिले त्यो संख्या बढेर ९ सय पुगेको छ’, प्रवक्ता गौतमले भने।
यस्तै उनले एक सय १० भेन्टिलेटर आउनेक्रममा रहेको बताए। कोरोना संक्रमणका जटिल बिरामीहरुलाई भेन्टिलेटर आवश्यक पर्छ।
लकडाउन र निषेधाज्ञा लामो समय गरे पनि सरकारले केही तयारी नगरेको मानिसहरुको प्रश्नको जवाफ दिँदै प्रवक्ता गौतमले उक्त प्रगति सुनाएका हुन्।
यस्तै उनले एक हजार ५११ आईसीयू बेडको संख्या बढेर २ हजार ६ सय पुर्याइएको बताए। चैतयता एक हजार ३६८ को संख्यामा रहेको आइसोलेसन बेड हाल २० हजार ७६५ रहेको प्रवक्ता गौतमले बताए।
यस्तै हालसम्म २२ हजार क्षमताका पीसीआर मेसिन जडान गरिएको र दैनिक औसत १२ हजार परीक्षण हुने गरेको उनको भनाइ थियो।
प्रतिक्रिया