युनिकोड
मोरङ केराबारी गाउँपालिका ३ का ३२ वर्षीय हस्तबहादुर राई शिकार खेल्दा आफ्नै साथीले चलाएको भरुवा बन्दुकको गोली लागी मृत्यु भएको खुलेको छ।
यही वैशाख ८ गते साँझ उनी सोही स्थानमा रहेको बाँसघारी खोप सरकारी राष्ट्रिय वन जंगलमा सोही स्थानका ३७ वर्षीय गजेन्द्र राई र २६ वर्षीय रुबिन लिम्बुसँग शिकार खेल्न गएका थिए।
वैशाख ९ गते दिउँसो गजेन्द्र र रुबिनले हस्त बहादुरको शिकार खेल्ने क्रममा आफैँले चलाएको गोली लागी मृत्यु भएको भनी प्रहरीलाई खबर गरे।
लगत्तै घटनास्थलमा इलाका प्रहरी कार्यालय केराबारीबाट प्रहरी टोली खटिएको टोलीले घटनास्थलबाट १ थान भरुवा बन्दुक फेला पारेको थियो।
घटना सम्बन्धमा थप बुझ्न इलाका प्रहरी कार्यालय बेलबारीबाट प्रहरी टोली खटिएकोमा गजेन्द्र र रुबिनलाई पक्राउ गरी अनुसन्धान थालेको थियो।
अनुसन्धानको क्रममा वैशाख ८ गते रातको ९ बजे गजेन्द्र राईले प्रहार गरेको भरुवा बन्दुकको गोली लागी हस्त बहादुर राईको घटनास्थलमा मृत्यु भएको खुल्न आएको इलाका प्रहरी कार्यालय बेलबारीले जनाएको छ।
पक्राउ परेकाउपर ज्यानसम्बन्धी कसुर र हातहतियार खरखजाना कसुरमा म्यादथप गरी थप अनुसन्धान भइरहेको सो कार्यालयले जनाएको छ।
प्रतिक्रिया