युनिकोड
नेपाल उद्योग वाणिज्य महासंघ र अमेरिकी दूतावासको सहकार्यमा महासंघ सचिवालय, टेकुमा उद्योग : नेपालीको प्राथमिकताप्राप्त क्षेत्रहरुका लागि एआई विषयक एकदिवसीय अभिमुखीकरण कार्यक्रम सम्पन्न भएको छ ।
कार्यक्रममा उद्योगी व्यवसायीहरुले एआईको प्रयोगबाट नेपाली व्यवसायको प्रतिस्पर्धात्मक क्षमता बढाउनुपर्नेमा जोड दिएका छन् ।
कार्यक्रममा बोल्दै महासंघका उपाध्यक्ष प्रवलजंग पाण्डेले कृत्रिम बौद्धिकता (एआई) नेपाली निजी क्षेत्रको उत्पादकत्व, प्रतिस्पर्धात्मक क्षमता र नवप्रवर्तन बढाउने महत्वपूर्ण माध्यम भएको बताए।
एआईको जिम्मेवार प्रयोग, डिजिटल पूर्वाधार, सीप विकास र नीति सुधारमार्फत नेपालले प्रविधिमा आधारित आर्थिक विकासलाई गति दिनुपर्ने बताउँदै उपाध्यक्ष पाण्डेले सरकार, निजी क्षेत्र र अन्तर्राष्ट्रिय साझेदारबीच सहकार्यबाट नेपालको आवश्यकता अनुरूप एआई इकोसिस्टम निर्माण गर्नुपर्नेमा जोड दिए।
“नेपालमा पनि युवा उद्यमी, स्टार्टअप तथा नवप्रवर्तकहरूबीच एआईप्रति बढ्दो चासो देखिएको छ । ग्राहक सेवा, डिजिटल भुक्तानी, फिनटेक, स्मार्ट कृषि, पर्यटन प्रवर्द्धन, स्वास्थ्य सेवा र शिक्षा क्षेत्रमा एआईको प्रयोगका सम्भावना विस्तार हुँदै गएको छ । उपयुक्त नीति, डिजिटल पूर्वाधार, सीप विकास र लगानी सुनिश्चित गर्न सके नेपाली युवालाई प्रविधिको उपभोक्ता मात्र होइन, एआईमा आधारित समाधानका सिर्जनाकर्ता बनाउन सकिन्छ”, उपाध्यक्ष पाण्डेले भने।
कार्यक्रममा अमेरिकी कम्पनी लिफ्ट डट एआईका संस्थापक तथा प्रमुख एआई अधिकृत डेभिड स्वाइसगुडले एआईको व्यावसायिक प्रयोग, विश्वव्यापी अभ्यास तथा नेपालका प्राथमिकता प्राप्त क्षेत्रहरूमा एआईको सम्भावना र चुनौतीबारे धारणा राखेका थिए।
साथै, उनले एआईको प्रयोगलाई निरन्तर अभ्यास गर्दै सीप विकास गर्न सकिने धारणा राखे।
महासंघकी केन्द्रीय सदस्य जुना माथेमाले डिजिटल रूपान्तरणको वर्तमान युगमा एआई निजी क्षेत्रका लागि अवसर मात्र नभई आवश्यकता बनिसकेको बताउँदै नेपाली उद्योग–व्यवसायलाई प्रविधिसँग जोड्दै नवप्रवर्तन, अनुसन्धान तथा डिजिटल सीप विकासमा लगानी गर्न सके मुलुकको आर्थिक प्रतिस्पर्धात्मक क्षमता अभिवृद्धि हुने धारणा राखे।
कार्यक्रममा सहभागी उद्योगी, व्यवसायी तथा विभिन्न क्षेत्रका प्रतिनिधिहरूले आफ्नो व्यवसायमा एआईको प्रयोग, कार्यान्वयनका चुनौती, डेटा व्यवस्थापन, बजार विस्तार, ग्राहक सेवा तथा उत्पादन व्यवस्थापनसँग सम्बन्धित विविध जिज्ञासा राखेका थिए ।
कार्यक्रममा महासंघका पदाधिकारी, कार्यसमिति सदस्य, विभिन्न वस्तुगत संघका प्रतिनिधि, उद्योगी, व्यवसायी तथा सूचना प्रविधि क्षेत्रका सरोकारवालाहरूको सहभागिता थियो।
प्रतिक्रिया