टिकटक राम्रो हो तर सेलिब्रिटीहरु हलुका हुनुहुँदैन : रमेश उप्रेती

एक कार्यक्रममा पत्रकारले उनलाई सोधे, ‘कलाकारले टिकटक बनाउनु हुन्छ कि हुँदैन?’ उनको उत्तर थियो, ‘तपाईं नेपाली फिल्म क्षेत्रलाई माया गर्नुहुन्छ र व्यवसायिक कलाकार बन्न चाहनुहुन्छ भने रिजर्भ बस्नुपर्छ। हरेक क्रियाकलापको टिकटक बनाउनु ठीक होइन।'
 
मनोरञ्जनको माध्यम भए पनि पैसा तिरेर हलमा हेरिने कलाकारहरु टिकटकमा लागेर हलुका हुनु राम्रो नहुने उनले बताए। 

‘म निर्माताको हैसियतमा पनि भन्छु। कुनै कलाकारमाथि निर्माताले विश्वास गरेर लाखौं-करोडौंमा फिल्म बनाउँछु', उनले भने, 'तर त्यही कलाकारलाई सित्तैमा टिकटकमा हेर्न पाइन्छ भने दर्शक किन हलसम्म जान्छन्? यसबारे सबैले सोचौँ।'

उप्रेतीले पछिल्लो पटक चलचित्र ‘ऐश्वर्य’ पछि अभिनय गरेका छैनन्। उप्रेती यो फिल्मको यूट्युब राइट्स बेचेर पछुताएको पनि बताए। 

फिल्मको यूट्युब राइट्स ९९ वर्षका लागि बेचिने भएकाले आम्दानीको रोयल्टी निर्माताले एक रुपैयाँ पनि नपाउने उनले बताए। 

केही लाखको लोभमा करोडौंमा बनेको फिल्मको यूट्युब राइट्स नबेच्न पनि उनले अन्य निर्मातालाई  भनेका छन्।