लता मंगेशकरको स्वास्थ्यमा सुधार

सर्वश्रेष्ठ गायिकाको सम्मान पाएकी लता मंगेशकरको स्वास्थ्यमा सुधार आएको छ।

स्वास प्रस्वासमा समस्या आएपछि उनलाई एक साताअघि मुम्बईको ब्रीच केन्डी अस्पतालको आईसियुमा भर्ना गरिएको थियो। पछिल्लो साता उनको निधन भएको समाचार सामाजिक संजालमा भाइरल भएको थियो। तर, सो समाचार गलत भएको उनको परिवारका सदस्यले बताएका थिए।

लता बिरामी भएपछि विश्वभरबाट उनको स्वास्थ्यलाभको कामना गरिएको थियो। यसै वर्ष उनले आफ्नो ९० औँ जन्मदिन मनाएकी थिइन्। उनले सन् २००१ मा सर्वोच्च भारतको नागरिक भारतरत्न सम्मान पाएकी थिइन्।

उनले ३६ भारतीय भाषामा आफ्ना गीतहरु रेकर्ड गराएकी छन्। उनका नाममा अन्य कैयौँ प्रख्यात अवार्डहरु पनि छन्। सन् १९४८ देखि १९७४ बीच उनले २५ हजारभन्दा धेरै गीत गाएकी थिइन्। उनले हालसम्म ३० हजार गीत गाएकी छन्।