करण परियार र अनु चौधरीको स्वरमा ‘बुलाकी’ को नयाँ गीत सार्वजनिक

साउन ३२ गतेबाट पुनस् प्रदर्शन हुने फिल्म ‘बुलाकी’ को नयाँ गीत सार्वजनिक गरिएको छ। ‘रातले कुर्या चन्द्रमा’ बोलको गीतमा करण परियार र अनु चौधरीको स्वर सुन्न सकिन्छ।
 
गीतमा धनबहादुर गिरी (बाबुल) को शब्द र संगीत रहेको छ। गीतमा एरेञ्ज  बाबुलकै छ। सार्वजनिक गीतको भिडिओमा मुख्य कलाकार अभिनेत्री सुरक्षा पन्त र अभिनेता विराज बिष्ट फिचर्ड छन्। दुबैबीच पलाएको मायाप्रेमलाई भिडिओमा प्रस्तुत गरिएको छ। 

छत्रेश्वरी म्यानेजमेन्ट प्रालीको ब्यानरमा बनेको फिल्मले कर्णालीको जारीप्रथाको कथा समेटेको छ। लक्ष्मण सुनारको निर्देशन रहेको यस फिल्मको कथा राजबहादुर सानेले लेखेका हुन्। 

फिल्ममा सुरक्षा र विराजसहित नरेन खड्का र नव कलाकार सरस्वती खत्री, लक्ष्मी गिरी, सुशील पोखरेल, रमेश बुढाथोकी, कुलद्विप अधिकारी, झलनाथ खत्री, उपसना नेम्वाङ, लक्ष्मण देवकोटा, विनयराज पौडेल, सोनु सेढाइ लगायतका कलाकारको अभिनय छ। 

शिव ढकालको छायांकन रहेको यस फिल्मलाई काठमाडौँमा रीच इन्टरटेनमेन्ट र मोफसलमा एफडी कम्पनिले वितरणको जिम्मा लिएको छ।