पारिवारिक कथा झल्काउने ‘हर्ष’ को पोस्टरमा खगेन्द्र, वर्षा र साइमन

आगामी मंसिर १२ गतेबाट प्रदर्शनमा आउने सिनेमा ‘हर्ष’को नयाँ पोस्टर सार्वजनिक गरिएको छ। शुक्रबार सार्वजनिक पोस्टरमा फिल्मका तीन मुख्य पात्र खगेन्द्र लामिछाने, वर्षा राउत र बाल कलाकार साइमन वादीलाई प्रस्तुत गरिएको छ ।

पोस्टरले सिनेमा पूर्ण रूपमा पारिवारिक कथामा निर्माण भएको झल्को दिन्छ। खगेन्द्र र वर्षा छोरासँग खुशी भावमा प्रस्तुत छन्। जसले सन्तानप्रति अविभावको लगाव त्यसले दिने आनन्दायी क्षणलाई सिनेमाको मुल कथाको रुपमा प्रस्तुत गरिएको आभाष पोस्टरले गराएको छ।

यस फिल्मलाई डेव्यु निर्देशक एकता पौडेलले निर्देशन गरेकी हुन्। उनी स्वर्गिय निर्देशक शिव रेग्मीकी भान्जी हुन्। न्यूयोर्क फिल्म एकेडेमीमा सिनेमा मेकिङ अध्ययन तथा आमसंचारमा स्नातक र व्यवस्थापन तथा नेतृत्व विषयमा स्नातकोत्तर गरेकी निर्देशक पौडेलले यसअघि केही छोटा सिनेमा समेत निर्माण गरेकी छन्। 

यस फिल्ममा खगेन्द्र, वर्षा र साइमनसहित निर शाह, सन्तोष पन्त, शर्मिला मल्ल, माओत्से गुरुङ, विशाल पहाडी, निमा पाण्डे, लुनिभा तुलाधर, अंशु महर्जन, रेनु प्रधान, सुवर्ण थापा, श्रृष्टि महर्जन, सिर्जना नापितको अभिनय छ। सिनेमामा आलोक शुक्लाको छायांकन, समीररहिमाल, वसन्त सापकोटा तथा एलिश कार्काको संगीत, लोकेश बज्राचार्यको सम्पादन तथा सुनिल क्षेत्री र निर्देशक पौडेलको कोरियोग्राफी रहेको छ ।