काठमाडौँमा ‘नीलो प्रेम’को प्रेमोत्सव

‘बेस्ट सेलर’ उपन्यास ‘नीलो प्रेम’ माथि किताब संवाद तथा लेखक-पाठक भेटघाट कार्यक्रम सम्पन्न भएको छ। प्रकाशनको आठ महिनामै ३० हजारभन्दा बढी प्रति बिक्री भएको यस उपन्यासमाथि लेखक पुरुषोत्तम बजगाईंसँग लेखक तथा पत्रकार दीपक सापकोटाले संवाद गरेका हुन्। 

काठमाडौँस्थित नेपाल प्रज्ञा-प्रतिष्ठानमा आयाजित कार्यक्रममा युवा पाठकको उल्लेख्य उपस्थिति थियो। प्रेम, मित्रता, परिवारिक सम्बन्ध र युवावस्थाको मानसिक द्वन्द्वलाई सरल र संवेदनशील ढङ्गले प्रस्तुत गरिएको छ। संवादमा लेखक पुरुषोत्तमसँग विशेषगरी किशोर-किशोरीबीचको प्रेम सम्बन्ध र जीवनका उतारचढावका विषयमा सापकोटाले चासो राखेका थिए।

जवाफमा लेखक बजगाईंले युवावस्थाको मनोविज्ञानलाई पुस्तकमा समेट्ने प्रयास गरेको बताए। प्रेम, मित्रता, परिवार, आत्मपहिचान र समाज किशोरावस्थाका अत्यन्त संवेदनशील विषय पुस्तकमा ती विषय समेट्ने प्रयास गरेको बताएका थिए।

‘कथाको विषयवस्तु नीलो आकाशझैँ विशाल र सागरझैँ हार्दिकताको गहिराइको चरणमा हुने अनन्त आदर्श प्रेमको हो। यसैले पुस्तकको शीर्षक पनि सान्दर्भीक छ। पुस्तकको नीलो रंगले यही द्वन्द्व, गहिराइ र एक्लोपनलाई प्रतीकात्मक रूपमा बोकेको छ,’ लेखक बजगाईंले भने, ‘उपन्यास लेख्दा मैले युवावस्थाको यही मनोविज्ञानलाई नजिकबाट बुझ्ने प्रयास गरेको थिएँ।’

आजका युवाको प्रेम सम्बन्धमाथि समाजमा भ्रम र पूर्वाग्रह रहेकोमा आफू उनीहरूको भावनालाई दोष दिने होइन, तिनलाई बुझ्ने पक्षमै रहेको लेखकको भनाइ थियो। ‘प्रेम कहिले कठोर, कहिले कोमल रूपमा संसार बुझ्ने विशिष्ट माध्यम हो’, बजगाईंले भने। 

पत्रकार सापकोटाको ‘पुस्तक बहुचर्चित भएपछि अब यसलाई दृष्यमा पनि देख्न पाइन्छ?’ भन्ने प्रश्नमा लेखक बजगाईंले ‘त्यो सम्भावना नरहेको’ बताए। ‘नीलो प्रेम’ लाई फिल्म बनाउने वा नाट्य रूपान्तरण गर्नेभन्दा पनि किताबकै रुपमा सीमित राख्ने आफ्नो चाहना भएको लेखकले बताए। कथाको अन्त्य ‘ओपन इन्डिङ’ भएको प्रशंगमाथि विमर्श गर्दै सापकोटाको ‘पुस्तकको सिक्वेल सम्भावना छ?’ भन्ने प्रश्नमा लेखक बजगाईंले ‘त्यो सम्भावना नरहेको’ सुनाए। 

समीक्षकका अनुसार, प्रेमकथामा आधारित भए पनि ‘नीलो प्रेम’ उपन्यासले सामाजिक, सांस्कृतिक र आर्थिक आयामलाई पनि निकै सूक्ष्म रूपमा उतारेको छ। आदर्श प्रेमको पक्षलाई जीवन्त बनाएको यो किताब सबै उमेर समूहका पाठकका लागि उपयुक्त रहेको इन्डिगो इन्कका अध्यक्ष विष्णुकुमार पौडेलले बताए।

‘नीलो प्रेम’ बजगाईंको यो पहिलो किताब हो। पहिलो किताबबाटै बिक्रीमा नयाँ रेकर्ड बनाएको यो उपन्यास विशेषतः युवापुस्तामाझ लोकप्रिय छ।

टिकटकसहितका सामाजिक सञ्जालमा पुस्तकका भावनात्मक अंशहरू पढेर नाच्दै, हाँस्दै, रुदै र भावुक बनेका पाठकका भिडिओहरू भाइरल भइरहेका छन्। इन्डिगो इन्क प्रालिले प्रकाशन गरेको ‘नीलो प्रेम’ को मूल्य ७९९ रुपैयाँ रहेको छ।