काभ्रेको पनौतीबाट सुरू भयो ‘झिँगेदाउ २’ को छायांकन

ज्ञानेन्द्र देउजाको निर्देशन रहेको फिल्म ‘झिँगेदाउ २’को छायांकन सुरु भएको छ। सोमबार शुभमुहूर्त गरिएको फिल्मको सुटिङ आजै काभ्रेको पनौतीबाट सुरू गरिएको हो। 

साढे तीन करोड लगानी रहने सुपरहिट सिनेमा ‘झिँगेदाउ’को सिक्वेलको सुटिङ सुरु गरिएको निर्माता समेत रहेको निर्देशक देउजाले बताए।
मुख्य अभिनेता आर्यन सिग्देलको मुहूर्त सटबाट छायांकन सुरु भएको सिनेमाको सेड्युल ६० दिनको राखिएको छ।

यस सिनेमाका लागि काभ्रेको पनौतीमा भव्य सेट लगाइएको छ। त्यसपछि काठमाडौं, भक्तपुर, साँखु, तनहुँ, बन्दीपुर, देवघाट, दोलखा, चित्लाङ र पालुङमा यो सिनेमाको छायांकन गरिनेछ।

अर्को वर्षको दशैंमा रिलिज लक्ष्य राखिएको सिनेमाको कथा ‘झिँगेदाउ’ सकिएको दृश्यबाट नै निरन्तरता दिएको छ ।