इलाममा सञ्जालनमा आयो फ्रेन्ड्स सिनेमाजको नयाँ हल, पल शाहले गरे उद्घाटन

धरान र बुटवलपछि पूर्वको इलाममा ‘फ्रेन्ड्स सिनेमा’ को नयाँ शाखा सञ्चालनमा आएको छ। शुक्रबार एक भव्य समारोहका बीच इलाम नगरपालिका–७ स्थित नयाँ शाखाको औपचारिक उद्घाटन गरिएको हो ।

नयाँ हलको उद्घाटन कार्यक्रममा अभिनेता पल शाहसहित अभिनेत्री उषा उप्रेती र निर्देशक तथा निर्माता चन्द्र पन्तको विशेष उपस्थिति रहेको थियो। 

आफ्ना प्रिय कलाकारलाई नजिकैबाट देख्न पाउँदा इलामेली दर्शकहरूको उत्साहित थिए । हल परिसरमा दर्शकको बाक्लो उपस्थिति र हुटिङले कार्यक्रम निकै उत्सवमय बनेको थियो ।

करिब ३ करोड ५० लाख रुपैयाँको लगानीमा निर्माण गरिएको यो हलमा १८८ सिट क्षमता रहेको छ। नगरपालिकाको बहुतले पार्किङ भवनमा सञ्चालनमा आएको यस सिनेमा हलमा विश्वस्तरीय प्रविधि प्रयोग गरिएको छ ।