युनिकोड
सञ्जय राईको डेब्यु निर्देशनमा पिल्म ‘एक्का मिस्सी बादशाह’ को घोषणा गरिएको छ। शनिबार निर्देशक राईको जन्मदिनको अवसरमा निर्माण टिमले काठमाडौँमा कार्यक्रम आयोजना गर्दै पिल्मको घोषणा गरेको हो।
घोषणा रिलिज कार्यक्रममा निर्माण पक्षले कलाकार र प्राविधिक टोली सार्वजनिक गरेको छ। यस फिल्मको मुख्य भूमिकामा अभिनेत्री साम्राज्ञी राज्यलक्ष्मी शाह देखिनेछिन्।
फिल्मभित्र उनी 'आश' पात्रको भूमिकामा देखिनेछिन्। निर्माण टिमले उनको बोल्ड लुक्ससहितको तस्बिर सार्वजनिक गर्दै उनको पात्रबारे जानकारी दिएको छ ।
२ वर्षको अन्तरालपछि नयाँ फिल्ममा जोडिएकी साम्राज्ञीले आफूलाई मन पर्ने क्यारेक्टर नपाएकाले सिनेमामा ग्याप देखिएको सुनाइन्। यसअघि उनी 'बर एण्ड बधु' मा देखिएकी थिइन्।
यस सिनेमामा भने आफ्नो पात्र मन परेकाले काम गर्न तयार भएको बताइन्। आफ्नो भूमिका साहसिक, बोल्ड, निडर र फरक किसिमको रहेको बताउँदै सिनेमालाई लिएर निकै उत्साहित रहेको उनको भनाइ छ।
‘म यो सिनेमा र सिनेमाको टिमसँग जोडिन पाउँदा निकै खुसी छु। मलाई सिनेमाको क्यारेक्टर मन पर्यो, त्यसैले काम गर्न राजी भएकी हुँ’, उनले भनिन्, ‘सुरुमा केही आनाकानी गरिरहेको थिएँ, तर निर्देशकले सिनेमाको क्यारेक्टरबारे बताएपछि मेरो सोच परिवर्तन भयो।’
उनले निर्देशकले आफ्नो सोचअनुसार नै उक्त पात्रलाई विकास गर्न खोजेको बताइन्। ‘उहाँले मेरो भिजनसँग मिल्ने गरी त्यो क्यारेक्टरमार्फत सिनेमा बनाउने सोच्नुभएको रहेछ । मैले स्क्रिप्ट पढेँ, म त छक्क परेँ । मेरो क्यारेक्टर धेरै साहसिक, बोल्ड, निडर र फरक किसिमको छ,’ पात्रबारे साम्राज्ञीले भनिन् ।
यूके बस्दै आएका सञ्जय लामो समयदेखि सिनेमा मेकिङ र निर्देशनप्रति रुचि राख्दै आएका थिए। यूके बसाइँका क्रममा पनि सिनेमा निर्माणप्रतिको आफ्नो प्यासनलाई निरन्तरता दिँदै आएका राईको यो पहिलो निर्देशन यात्रा हो।
सिनेमाको ट्यागलाइन 'कोही जित्छन्, कोही हार्छन्, कोही बादशाह बन्छन्' राखिएको छ। जित, हार र सफलताको यात्रालाई केन्द्रमा राख्ने भाव बोकेको यो स्लोगनले सिनेमाको कथावस्तुको संकेत गर्छ।
डेब्यु निर्देशक सञ्जयले सिनेमा युवापुस्ताको कथामा आधारित रहेको बताए । उनका अनुसार यो अहिलेको सामाजिक सञ्जालको पुस्ता, प्रेम, सम्बन्ध र जीवनका उतारचढावमा केन्द्रित रहनेछ ।
‘इट्स अ भेरी योङ फन मुभी। हामीले अहिलेको उमेर समूहलाई केन्द्रित गरेर सिनेमा बनाउँदैछौँ। हामीले जसरी मायालाई एक्सप्लोर गर्छौँ, त्यही भाव सिनेमामा छ। यो दुई साथीको कथा हो सिनेमामा उनीहरू हुर्किंदै जाँदा जीवनमा आउने ट्विस्ट एन्ड टर्न र समाज तथा परिवारको अपेक्षालाई कसरी सामना गर्छन् भन्ने कुरा सिनेमामा देखाइनेछ,’ निर्देशक राईले भने ।
सिनेमामा कार्यकारी निर्माता सुदीप्ता, लाइन प्रोड्युसर एलोन गुरुङ र प्रोजेक्ट सुपरभाइजर सुपथ श्रेष्ठ रहेका छन्। यस सिनेमाको छायांकन आगामी फागुनबाट सुरु हुनेछ। सिनेमा घोषणा कार्यक्रममा सिनेमाकी कार्यकारी निर्माता सुदीप्ताले 'एक्का मिस्सी बादशाह' आफ्नो लागि विशेष परियोजना भएको बताइन् ।
निर्माण पक्षका अनुसार सिनेमाका लागि ‘क्रिश’ र ‘अर्जुन’ नामका दुई मुख्य पुरुष पात्रको खोजी भइरहेको छ । डेब्यु निर्देशक राईका अनुसार यी भूमिकाका लागि अडिसन खुला गरिएको छ। सिनेमामा अन्य कलाकारसहित थप विवरण आगामी दिनमा सार्वजनिक गर्ने निर्माण पक्षले बताएको छ ।
प्रतिक्रिया