ह्यारीले आत्मकथामा गरेका १३ सनसनीपूर्ण खुलासा

‘तिम्रो आमा भन्छिन्, मैले बाँच्न नसकेको जीवन तिमी बाँचिरहेका छौ। उनले चाहेको जीवन तिमीले बाँचिरहेका छौ,’ ह्यारीलाई ती महिलाले भनेकी थिइन्।

ह्यारी १२ वर्षको हुँदा पेरिसमा कार दुर्घटनामा परी डायनाको मृत्यु भएको थियो।

३. डायनाको मृत्यु हुँदा चार्ल्सले ह्यारीलाई अंकमाल गरेनन्
ह्यारीका अनुसार डायना दुर्घटनामा परेको खबर दिन बुबा चार्ल्सले उनलाई उठाएका थिए। त्यसबेला बुबाले आफूलाई अंकमाल नगरेको उनले बताएका छन्। 

यो पीडाबाट उन्मुक्ति पाउन दुर्घटनाअघि डायनाले गरेजस्तै कारयात्रा आफूले गरेको तर उनको मृत्युको कारणबारे अझ धेरै प्रश्न मनमा उब्जेको उनले बताएका छन्।

४. विलियमले ह्यारीलाई भुइँमा पछारे
पत्नी मेगनका विषयमा दाजुसँग झगडा भएको र अन्तिममा उनले आफूलाई पछारेको ह्यारीको भनाइ छ। पुस्तकमा ह्यारीले २०१९ मा लन्डनस्थित आफ्नो घरमा विलियमले मेगनलाई ‘अप्ठेरो’, ‘अशिष्ट’ र ‘झगडालु’ भनेको उनले बताएका छन्।

झगडा बढ्दै जाँदा विलियमले कलरमा समातेर, नेकलेस चुँडाएर आफूलाई भुइँमा पछारेको ह्यारीले लेखेका छन्।

‘यो सब एकदम छिटो भयो। साह्रै छिटो। उनले मेरो कलर समाते, नेकलेस चुँडाए र भुइँमा पछारे। म कुकुरलाई खाना दिने भाँडोमाथि पछारिएँ। जुन फुट्दा त्यसको टुक्रा मेरो ढाडमा भास्सियो। केही क्षण म त्यहीँ पल्टिएँ, छक्क परेर। त्यसपछि उठेर मैले उनलाई मेरो घरबाट निस्किन भनेँ,’ ह्यारीले लेखेका छन्। 

आफ्नो पुरा नाम हेनरी चार्ल्स अल्बर्ट डेविड भएपनि विलियमले बारम्बार आफूलाई ह्यारोल्ड भन्ने गरेको उनको भनाइ छ।

५. १७ वर्षको उमेरमा गुमाए कुमारत्व
आफू १७ वर्षको छँदा आफूभन्दा पाकी महिलासँग पहिलो पटक यौनसम्बन्ध राखेको चर्चा उनले गरेका छन्। सो घटना एउटा पबभन्दा पछाडिको चौरमा भएको थियो।

सो यौनसम्बन्धका क्रममा ती महिलाले आफूलाई बछेडासँगजस्तो व्यवहार गरेको भन्दै त्यो अपमानजनक अनुभव भएको उनको भनाइ छ।

६. ह्यारीको नाजी पहिरन देखेर विलियम र क्याथरिन हाँसे
२००५ मा एउटा पार्टीमा सहभागी हुनुअघि नाजी पहिरन लगाएर देखाउँदा विलियम र क्याथरिन हाँसेको ह्यारीले उल्लेख गरेका छन्। पाइलटको पहिरन लगाउने कि नाजी बर्दी भन्ने विषयमा आफूले उनीहरुलाई सोधेको उनको भनाइ छ।

‘मैले विल र केटलाई फोन गरेँ र सोधेँ, कुन लगाउँदा ठिक?’ उनले लेखेका छन्, ‘नाजी बर्दी लगाऊ, उनीहरुले भने।’

‘मैले त्यो भाडामा लिएँ, जुँगासहित म घर फर्केँ।’

‘विल र केट दुवै हाँसिरहेका थिए,’ उनले लेखेका छन्।

त्यो घटना उनी २० वर्षको छँदा भएको थियो। त्यतिबेला द सनले पार्टीमा नाजी बर्दी लगाएर सहभागी भएका ह्यारीको तस्बिर छापेको थियो।

७. १७ वर्षमा कोकिन र इटन कलेजमा गाँजा खाए
१७ वर्षको उमेरमा आफूलाई कोकिन दिइएको उनले बताएका छन्। त्यसपछि पनि अनेक पटक आफूले कोकिन प्रयोग गरेको उनको भनाइ छ। तर, त्यसबाट आफूलाई कहिल्यै मजा नआएको ह्यारीले लेखेका छन्।

इटन कलेजमा विद्यार्थी छँदा पनि आफूले गाँजा तानेको उनले बताएका छन्। बाथरुममा आफूले गाँजा तानिरहँदा उनको बडीगार्डहरु भने भवनबाहिर गस्ती गरिरहेका थिए।

२०१६ मा क्यालिफोर्निया जाँदा आफूले म्याजिक मसरुम पनि खाएको उनले बताएका छन्।

८. ह्यारी इटनमा भर्ना भएको विलियमलाई मन परेको थिएन
ह्यारीका अनुसार उनी इटन कलेज भर्ना हुन लाग्दा दाजुले उनलाई भनेका थिए, ‘ह्यारोल्ड, तिमी मलाई चिन्दैनौ, म तिमीलाई चिन्दिनँ।’

विलियमले ह्यारी आउनुअघिको दुई वर्ष इटन कलेज आफ्ना लागि रमणीय स्थल बनेको बताएका थिए। 

‘किनभने त्यहाँ उनलाई सानो भाइको बोझ थिएन। जो उनलाई प्रश्न गरेर हैरान पार्थ्यो र उनको सामाजिक वृत्तमा प्रवेश गथ्र्यो,’ ह्यारी लेख्छन्।

त्यसपछि आफूले विलियमलाई चिन्ता नगर्न भनेको उनको भनाइ छ। ‘म तिमीलाई चिन्छु भन्ने नै बिर्सिदिनेछु,’ ह्यारीले भनेका थिए।

९. अफगानिस्तानमा २५ तालिबान लडाकु मारे
२०१२–१३ मा अफगानिस्तानमा हेलिकोप्टर पाइलटका रुपमा कार्यरत रहँदा आफू ६ वटा मिसनमा सहभागी भएको र प्रत्येक पटक मानिसहरुको ज्यान गएको उनको भनाइ छ।

तर, ती मृत्युलाई आफूले न्यायोचित ठानेको खुलासा उनले गरेका छन्।

‘यो तथ्यांकले मलाई गर्व लाग्दैन। तर, यसबाट म लज्जित पनि हुन्नँ,’ उनले लेखेका छन्, ‘लडाइँको जोस र द्विविधामा परेको बेला मैले ती २५ जनालाई मान्छेका रुपमा हेरिनँ। ती त चेसका गोटी थिए, जसलाई बोर्डबाट हटाइएको थियो। खराब मानिसहरुलाई मारियो ताकि तिनले राम्रा मान्छे मार्न नसकुन्।’

ह्यारीको यो टिप्पणीपछि तालिबानका एक नेता अनस हक्कानीले ट्विट गरेका छन्, ‘मिस्टर ह्यारी, तिमीले मारेकाहरु चेसका गोटी थिएनन्। ती मानिस थिए। तिनका परिवार पनि तिनलाई पर्खिरहेका थिए। अन्तर्राष्ट्रिय अपराध अदालतले तिमीलाई झिकाउने वा मानवअधिकारवादीहले तिमीलाई भर्त्सना गर्ने आशा मलाई छैन।’

बेलायतका एक पूर्वकर्णेलले पनि ह्यारीको यो खुलासा सेनाविरुद्धको प्रहार भएको बताएका छन्।

१०. ह्यारी र मेगनको विवाहका लागि गाउँको गिर्जामा जान विलियमको सुझाव
मेगनसँगको आफ्नो विवाहको विषयमा शाही परिवारले अत्तो थापेको ह्यारीको आरोप छ।

उनका अनुसार सेन्ट पौल गिर्जामा विवाह गर्दा कसो होला भनेर सोध्दा विलियमले त्यो सम्भव नरहेको बताएका थिए। किनभने त्यहाँ चार्ल्स र डायना तथा विलियम र केटको विवाह भएको थियो। बरु, कस्टवल्ड्सस्थित गाउँको गिर्जामा विवाह गर्न उनले सुझाएका थिए।

२०१८ मा ह्यारी र मेगनको विवाह विन्डसर क्यासलस्थित सेन्ट जर्ज गिर्जामा भएको थियो।

११. सार्वजनिक समारोहअघि ‘प्यानिक अट्याक’ हुन्थ्यो
२०१३ मा सार्वजनिक समारोहहरुमा देखिनुपर्ने अवस्थामा आफूलाई चिन्ताले गाँज्ने गरेको उनले उल्लेख गरेका छन्। अन्तर्वार्ता र भाषण दिन असम्भव लाग्नेगरेको उनको भनाइ छ।

भाषणअघि सुट लगाउँदै गर्दा पुरा जिउ पसिनाले भिज्ने उनले बताएका छन्।

‘ब्लेजर लगाएर जुत्ताको तुना बाँध्दासम्ममा मेरो गालामा पसिना दौडिरहेको हुन्थ्यो,’ उनले लेखेका छन्।

१२. विलियम र ह्यारीलाई झगडा नगर्न चार्ल्सको बिन्ती
महारानीका पति फिलिप्सको मृत्युपछि आफू र विलियमबीच झगडा भएको चर्चा उनले गरेका छन्। त्यतिबेला चार्ल्सले उनीहरुको बीचमा उभिएर भनेका थिए, ‘बिन्ती छ, मेरा अन्तिम वर्षहरुलाई थप कष्टदायी नबनाइदेऊ।’

१३. जगेडा छोरा थिए ह्यारी
ह्यारीको जन्म हुँदा चार्ल्सले डायनालाई भनेका थिए, ‘गज्जब। तिमीले मलाई एउटा उत्तराधिकारी र एउटा जगेडा दियौ। तिमीले आफ्नो काम गर्यौ।’

यो कुरा २० वर्ष पुगेपछि आफूलाई कसैले सुनाएको ह्यारीको भनाइ छ।

सोही आधारमा ह्यारीले आत्मकथाको शीर्षक स्पेयर अर्थात् जगेडा राखेका हुन्। बीबीसी