पन्जाबमा घरको छत खस्दा एकै परिवारका ५ जनाको मृत्यु

भारतको उत्तरी राज्य पन्जाबमा शनिबार घरको छाना खस्दा एकै परिवारका पाँच सदस्य (दम्पती र तिनका तीन छोराछोरी) को मृत्यु भएको प्रहरीले जनाएको छ।

भारतीय सञ्चारमाध्यमका अनुसार पन्जाबको अमृतसरबाट २८ किलोमिटर दक्षिण तरनतारन जिल्लाको पाण्डोरी गोला गाउँमा स्थानीय समयअनुसार बिहान ४:३० बजे एउटा पुरानो घरको छाना खसेको हो। 

प्रहरीका अनुसार परिवारका सदस्य सुतिरहेका बेला घरको छत खसेको थियो ।

‘घटना लगत्तै स्थानीयहरूले उद्धार कार्य गरे र उनीहरू सबैलाई भग्नावशेषबाट निकाले। उनीहरूलाई अस्पताल लगिए पनि त्यहाँका डाक्टरहरूले उनीहरूलाई मृत घोषणा गरे‘’, एक प्रहरी अधिकारीले भने। 

प्रहरीका अनुसार घर जीर्ण थियो।