युनिकोड
युरोपेली मुलुक स्पेन र पोर्चुगलमा सोमबार एकसाथ ठूलो मात्रामा विद्युत बन्द हुँदा त्यहाँको जनजीवन अस्तव्यस्त भएको छ।
तर अहिले दुवै देशमा विद्युत् पुन: आपूर्ति सुरु भइसकेको बीबीसीले जनाएको छ।
यसैबीच अधिकारीहरू त्यसरी एकैचोटि ठूलो मात्रामा विद्युत् किन कटौती भयो भन्ने कारण पत्ता लगाउने प्रयासमा जुटेका छन्।
स्पेनमा बिजुली लगभग पूर्ण रूपमा सञ्चालन भइसकेको छ भने पोर्चुगलमा पनि विद्युत् आपूर्ति सुरु भइसकेको छ।
पोर्चुगल सरकारले सोमबार राष्ट्रव्यापी ब्ल्याकआउटपछि बिजुली पुनर्स्थापित भएको पुष्टि गरेको छ। अहिले पोर्चुगलभर पानी आपूर्ति भइरहेको छ। राजधानी लिस्बन र पोर्टो सहरमा मेट्रो प्रणाली सञ्चालनमा छन्, तर केही ढिलाइ भइरहेका छन्।
लिस्बनको मुख्य विमानस्थलमा मर्मत अझै जारी छ, तर अन्य प्रमुख विमानस्थलमा धेरैजसो उडान सञ्चालन भइरहेका छन्।
सरकारका अनुसार विद्यालयहरू खुल्न लागेका छन्।
यसैबीच स्पेनका प्रधानमन्त्री पेड्रो सान्चेजले यस संकटसँग सम्बन्धित गलत सूचनाबाट सतर्क रहन चेतावनी दिएका छन्।
बिजुली अवरुद्ध हुनुको कारण अहिलेसम्म खुल्न सकेको छैन।
सुरुमा यो साइबर आक्रमण भएको अनुमान गरिएको थियो। तर धेरै जना अधिकारीले यसलाई तुरुन्तै खारेज गरेका थिए।
स्पेन सरकारले यस पछाडिको कारण छिट्टै स्पष्ट हुने आशा व्यक्त गरेको छ।
प्रतिक्रिया