युनिकोड
गत शुक्रबारदेखि जारी भारी वर्षा र पहिरोका कारण उत्तरी सिक्किमका अधिकांश सम्पर्क क्षेत्र राज्यको बाँकी भागबाट काटिएको छ।
बीबीसी हिन्दीका अनुसार अधिकांश सडक बन्द भएका कारण यस क्षेत्रमा आवागमन ठप्प भएको छ।
त्यहाँ फसेका पर्यटकलाई सुरक्षित रूपमा बाहिर निकाल्ने प्रयास भइरहेको छ। तर खराब मौसमले यसमा बाधा पुर्याइरहेको छ।
उत्तरी सिक्किमको मंगनका प्रहरी अधीक्षक सोनम डी भुटियाले लाचेनमा ११५ र लाचुङमा १,३५० पर्यटक फसेको जानकारी दिएका छन्।
उनका अनुसार पहिरोका कारण त्यहाँबाट निस्कने बाटो बन्द गरिएको हो। पर्यटकहरूलाई होटलमै बस्न भनिएको छ। बाटो खुलेपछि मात्र उनीहरूलाई त्यहाँबाट निकालिनेछ।
प्रहरीका अनुसार निरन्तर वर्षाका कारण टिस्टा नदीको पानीको सतह पनि खतराको चिह्ननजिक पुगेको छ।
पानीको सतह बढ्दै जाँदा मंगनलाई चुङथाङसँग जोड्ने बेली ब्रिज आंशिक रूपमा क्षति भएको छ।
शनिबार यस क्षेत्रमा लगभग तीन घण्टासम्म रेड अलर्ट जारी गरिएको थियो र मानिसहरूलाई घरभित्रै बस्न सल्लाह दिइएको थियो।
उत्तरी सिक्किमका अधिकांश क्षेत्रमा बिजुली आपूर्ति पनि बन्द भएको छ।
यसैबीच मुन्सिथाङ क्षेत्रमा बिहीबार राति कार नदीमा खस्दा त्यसमा रहेका ११ पर्यटकमध्ये ९ जनाको अवस्था अझै पत्ता लागेको छैन।
त्यस कारमा ओडिसा, उत्तर प्रदेश र त्रिपुराका पर्यटक थिए।
यीमध्ये अहिलेसम्म ओडिसाका दुई पर्यटक सुप्रतिम नायक र साइराजलाई मात्र उद्धार गरिएको छ।
सिक्किम सरकारले बेपत्ता पर्यटकहरूमा ओडिसाका अजित कुमार नायक, सुनिता नायक, सुशील जना र इतिश्री जना, त्रिपुराका देवज्योति जय देव र स्वप्निल देव तथा उत्तर प्रदेशका कौशलेन्द्र प्रताप सिंह र अंकिता सिंह रहेको बताएको छ।
प्रतिक्रिया